14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Շատ հարցեր կան՝ ուզում ենք լուծել, չենք կարողանում․ Փաշինյանի «խոստովանությունը»․ ՏԵՍԱՆՅՈւԹ
Քաղաքականություն
12.04.2023 | 19:53
«Կոռուպցիայի սխալ ընկալում կա և պատճառը պետական մարմինների դանդաղ աշխատանքն է, որ չեն հասցնում սպասարկեն բիզնեսին»,- այս մասին այսօր ԱԺ-ում հարցուպատասխանի ժամանակ նշեց ՔՊ խմբակցության պատգամավոր Խաչատուր Սուքիասյանը:
«Բիզնեսը բիզնեսի հետ շատ լավ աշխատում է, այն ընկերությունները, որ գալիս են Հայաստանում աշխատելու, շատ գոհ են: Բայց երբ պետք է գնան վարկ վերցնեն, մի տեղ շինարարություն անեն կամ մի այլ բիզնես անեն, տարբեր մարմիններից պետք է թղթեր ստանա, այդտեղ խնդիր ունենք, սովետական մոտեցումներով են աշխատում»,- նշեց պատգամավորը։
Սուքիասյանի դիտարկմամբ՝ անօրինականություն գործած ընկերություններից պետությունը միայն չվճարված հարկերն է գանձում. «Դրանից բացի դուք չեք ասում՝ այ ընկեր, դու մրցակցային դաշտում 10-20 կազմակերպության հետ մրցում էիր, դու էդ ժամանակ, որ անօրինականություն ես արել, նրանց հետ ես մղել, բա էդ կազմակերպությունների վնասը ո՞վ է հատուցելու»:
Ի պատասխան վարչապետ Նիկոլ Փաշինյանը նշեց, որ ամեն օր այդպիսի ահազանգեր ստանում են, սակայն երբեմն իրավիճակը բարելավելու կառավարության մղումը բերում է վիճակն ավելի վատացնելուն։
«Ձեր նշած բյուրոկրատական հիվանդությունները բուժելու համար, թե ինչ միջամտություն պետք է անել, մենք պրոֆեսիոնալ կարողությունների պակաս ունենք: Սա էլ գալիս է նրանից, որ այն մարդիկ, որոնք բարձր պրոֆեսիոնալ են, չեն գալիս մեզ մոտ աշխատելու, գաիս են ձեզ մոտ աշխատելու, որովհետև ձեզ մոտ ավելի բարձր աշխատավարձ են ստանում»,-ասաց Փաշինյանը, հետո իրեն ճշտեց, ոչ թե ձեզ մոտ, այլ ձեր կողմից հիմնադրած կառույցներում:
«Այդտեղ էլ կոռուպցիայի հետ կապված հարց կա: Շատ խոչընդոտներ կան, որոնք ստեղծվել են կոռուպցիոն տրամաբանության պատճառով, այսինքն՝ արհեստական խոչնդոտներ են ստեղծել, որ մարդիկ դրանցից ազատվելու համար ստիպված լինեն վճարել: Այստեղ շատ կարևոր է իմանալ՝ ինչը փոխել, որ հարցը լուծվի»,-ընդգծեց վարչապետը:
Սուքիասյանն արձագանքեց, որ պետությունը նորմալ չի հարաբերվում բիզնեսի հետ. «Շատ ժամանակ բողոքում են, որ հեռախոս չեն վերցնում, ինստիտուտները չեն աշխատում: Դա բերում է նրան, որ մարդը մտածում է՝ այ, նրան թույլ են տվել, մեզ հետ սկի կապի էլ դուրս չեն գալիս»:
«Կյանքը այդքան էլ պարզ չէ։ Շատ հարցեր կան՝ ուզում ենք լուծել, չենք կարողանում՝ մի քանի օբյեկտիվ պատճառներով»,- ասաց Փաշինյանը։
Մանրամասները՝ տեսանյութում։
