Զինվորական հագուստի վաճառքը կարգավորումների կարիք ունի․ ՊՆ փոխնախարար․ ՏԵՍԱՆՅՈՒԹ

Այսուհետ վարչական պատասխանատվություն կենթարկվի այն անձը, որը կրում է զինվորական համազգեստ, սակայն դրա իրավունքը չունի։ ԱԺ–ում, առաջին ընթերցմամբ ներկայացնելով «ՀՀ ԶՈւ կարգապահական կանոնագիրք» և «Զինվորական ծառայության և զինծառայողի կարգավիճակի մասին» օրենքներում փոփոխություններ կատարելու նախագիծը, ասաց պաշտպանության փոխնախարար Արման Սարգսյանը։

«Սա վերաբերելու է տվյալ պահին կառավարության կողմից սահմանած զինվորական համազգեստին»,- ասաց փոխնախարարը։ Նրա խոսքով` զինվորական համազգեստի` ազատ վաճառքի հետ կապված խնդիր կա և դա կարգավորման կարիք ունի, քանի որ յուրաքանչյուր ոք կարող է զինվորական համազգեստ ձեռք բերել։ Սակայն, ըստ Սարգսյանի, սանկցիաների պատճառով իրավիճակը կփոխվի, քանի որ կրողն անպայմանորեն պատասխանատվության կենթարկվի։

Սարգսյանը հավելեց` առաջիկայում կփոխվի ԶՈւ համազգեստը․«Մենք արդեն նախաձեռնել ենք համազգեստի փոփոխություն։ Գործընթացն սկսված է, ամբողջությամբ վերանայվում է. մոտ ապագայում ունենալու ենք նոր համազգեստ»։

Փոխնախարարը նաև նշեց, որ օրենքով սահմանված սահմանափակումները լրացվում են ծառայության կրման ցանկացած վայրում սմարթֆոն տիպի բջջային հեռախոս օգտագործելու արգելքով, բացառությամբ` պետական լիազոր մարմնի ղեկավարի հրամանով սահմանված դեպքերի։

Նրա խոսքով՝ զինծառայողներին արգելելով սմարթֆոն օգտագործել` կկանխվի նաև խաղադրույքներ կատարելու գործընթացը, որը համընդհանուր բնույթ է կրում։

«Սմարթֆոնների կրումն արգելվելու է ոչ միայն մարտական հենակետում կամ դիրքերում ծառայություն իրականացնող զինվորներին, այլ նաև զորամասերում։ Ինտերնետ հասանելիություն ունեցող «խելացի հեռախոս» կոչվածներն օգտագործելու հետևանքով, հակառակորդը տեխնիկական միջոցների օգտագործմամբ կարող է տեղորոշում իրականացնել։

Բացի դրանից՝ դրանցով կարող են սոցցանցերի միջոցով առաջարկվող խայծն օգտագործել, ներքաշվել ինչ-ինչ հարցերում»,–ասաց Սարգսյանը։
Նրա խոսքով` սահմանափակումը վերաբերելու է նաև պլանշետներին։ Փոխնախարարը նշեց, որ պատասխանատվությունը պետք է խստացնեն, որպեսզի ծնողները ոչ մի կերպ բանակում ծառայող իրենց տղաներին սմարթֆոններ չտանեն։ Սարգսյանը հավելեց, որ կոնկրետ հեռախոսներ կան, որոնց կրումը բանակում թույլատրվում է։

Մանրամասները՝ տեսանյութում։