Կարող էին ճանապարհին արգելափակոցներ դնել. Օհանյանը պնդում է՝ բախումը հնարավոր էր կանխել․ ՏԵՍԱՆՅՈՒԹ

Խնդիրը ծագել է դիրքային ճշգրտումների, ինժեներական կառույցների որոշակի բարելավումներ իրականացնելու շրջանակներում: Այս մասին այսօր ԱԺ-ում լրագրողների հետ զրույցում նշեց «Հայաստան» խմբակցության ղեկավար Սեյրան Օհանյանը՝ անդրադառնալով Տեղ գյուղի հարևանությամբ ապրիլի 11-ին արձանագրված ռազմական միջադեպին:

«Տա Աստված, որ մեր զինված ուժերն արագ վերականգնի իրենց մարտական կարողությունները: Փորձը ցույց է տալիս, որ որքան էլ 44-օրյա պատերազմից հետո մենք խոսում ենք Զինված ուժերի մարտունակության անկման մասին, բայց, այնուամենայնիվ, որոշ տեղային հատվածներում, որոշ ստորաբաժանումներն մեր զինծառակողներն իրենց խնդիրը կատարում են և հերոսություններ են ցուցաբերում»,- նշեց Օհանյանը:

Նրա դիտարկմամբ՝ երեկվա դեպքի հետ կապված խնդիրներ կան։ «Գործընթացը տեղի է ունեցել Հայաստանը Արցախին կապող միջանցքի շրջանակներում: 2020-ի նոյեմբերի 9-ի փաստաթղթով նախատեսված է 3 տարվա ընթացքում ճանապարհի նախագիծ կազմել ու կառուցել այդ այլընտրանքային ճանապարհը: Եթե նույնիսկ Ադրբեջանն այդ այընտրանքային ճանապարհը ժամանակից շուտ է կառուցել, ինչո՞ւ մեր իշխանությունները մեր հատվածը ժամանակին չեն կառուցել․․․
Մյուս կողմից՝ ինչպիսի մակարդակի վրա են գտնվում մեր հարաբերությունները ՌԴ-ի, նաև խաղաղապահ ուժերի հետ, որոնք միջանցքի դիտորդական առաքելությունն են իրականացնում:

Եվ ամենավերջինը, եթե կար կոնկրետ պայմանավորվածություն, որ ապրիլի 1-ին պետք է նոր ճանապարհը պատրաստ լիներ, այդ ճանապարհով կազմակերպվեր ամբողջ երթևեկությունը, և նաև դիրքային փոփոխություններ էին լինելու, ապա ի՞նչ գործողություններ էր ծրագրավորել մեր կողմը, ինչո՞ւ ժամանակին չի իրականացվել պլանավորումը և գործողությունների կազմակերպումը»,-նշեց պաշտպանության նախկին նախարարը:
Պատգամավորի դիտարկմամբ՝ բազմաթիվ քննադատություններից հետո էլ ՀՀ իշխանությունները հետևություններ չեն անում։ Օհանյանը Հայաստանի իշխանությանը խորհուրդ տվեց լուրջ հետևություններ անել ու դրանց շրջանակում կազմակերպել պաշտպանությունը, սահմանների ինժեներական կահավորումը և մնացած բոլոր անվտանգային խնդիրները:

«Գոյություն ունի մարտական հերթապահություն և գոյություն ունի պաշտպանական խնդիրների իրականացում, դրանք մի քիչ տարբեր են,- նշեց Օհանյանը՝ անդրադառնալով հարցին, թե հնարավո՞ր էր կանխարգելել Տեղ գյուղի հարևանությամբ ապրիլի 11-ին արձանագրված ռազմական միջադեպը։

«Բայց միևնույն է, յուրաքանչյուր գործողության իրականացման շրջանակներում էլ գոյություն ունեն նախազգուշացնող, նաև ժամանակավոր կահավորվածություն պահանջող ինժեներական սարքավորումներ ստեղծելու հնարավորություններ, կան ականապայթյունային և ոչ ականապայթյունային ինժեներական սարքավորումներ:
Տվյալ ժամանակահատվածում գոնե ճանապարհների վրա պետք է լինեն շարժական որոշակի լարային արգելափակոցներ: Օրինակ, Երևանում անհրաժեշտության դեպքում փողոցները փակելու, արագ արգելափակոցների ստեղծելու հնարավորություններ ունի նույնիսկ պարեկային ծառայությունը:

Եթե արգելափակոցներ լինեին, չէին մոտենա մեր դիրքերին, այս կոնֆլիկտը չէր լինի։ Եթե իրենց մեքենան կանգնեցնեին, մեր զինվորականներն արդեն կմտնեին խրամատներն ու ավելի անվտանգ կլինեին, իսկ 1-2 հոգի կբանակցեին, մնացածն իրենց նշանառության, դիտարկման տակ կվերցնեին հակառակորդի զինծառայողներին, որոնք այդ դեպքում համարձակություն չէին ունենա կրակել»,-ասաց Օհանյանը՝ ընդգծելով, որ այդ միջադեպը կանխել հնարավոր էր:

Մանրամասները՝ տեսանյութում։