16.01.2026 | 18:16
«Ռոսատոմ»-ի ձեռնարկության տնօրենը ձերբակալվել է՝ Ուկրաինայի զինված ուժերին ֆինանսավորելու կասկածանքով
Ովքեր են Թուրքիայի խորհրդարանական ընտրություններում առաջադրված հայ թեկնածուները
Քաղաքականություն
11.04.2023 | 14:23
Թուրքիայի կրոնական փոքրամասնությունների մի շարք ներկայացուցիչներ տարբեր կուսակցությունների կողմից առաջադրվել են որպես պատգամավորի թեկնածու մայիսի 14-ին կայանալիք ընտրություններում, գրում է Gercek news-ը։ Քրդամետ Ժողովուրդների դեմոկրատական կուսակցության (HDP) պատգամավոր Կարո Փայլանն այս անգամ չի առաջադրվել երկու ժամկետի սահմանափակման պատճառով։ Չնայած դրան՝ հայազգի թեկնածուներ կան ինչպես իշխող, այնպես էլ ընդդիմադիր կուսակցությունների ցուցակներում։
Իշխող «Արդարություն և զարգացում» կուսակցության (ԱԶԿ) հայ թեկնածու հայտնի բժիշկ Սևան Սիվաջըօղլուն Ստամբուլից, ըստ աղբյուրի, լավ հնարավորություն ունի մտնելու Թուրքիայի Ազգային մեծ ժողով, քանի որ նա 9-րդն է ԱԶԿ-ի թեկնածուների շարքում այն ընտրատարածքում, որտեղ կուսակցությունը 2018թ-ին ստացել էր 13 մանդատ։
Ստամբուլից մեկ այլ հայ թեկնածու՝ գլխավոր ընդդիմադիր Ժողովրդահանրապետական կուսակցությունից (CHP) Մարգարիտ Դիքմեն, ընտրվելու փոքր շանսեր ունի, քանի որ նա 23-րդ տեղն է զբաղեցնում թեկնածուների ցանկում այն ընտրատարածքում, որտեղ կուսակցությունը նախկինում ստացել էր 9 մանդատ:
Թուրքիայի Աշխատավորական կուսակցությունից Ստամբուլում առաջադրված է գրող, պատմաբան Մասիս Քյուրքջուգիլը։
Հիշեցնենք, որ Թուրքիայի խորհրդարանական ու նախագահական ընտրությունները տեղի են ունենալու մայիսի 14-ին։
Էմմա Չոբանյան
