19.03.2026 | 20:00
Թմրամիջոցներն առավել հասանելի են դարձել դեռահասներին. ինչո՞ւ է ուշանում կանխարգելումը․ ՔՆՆԱՐԿՈՒՄ
Ղազախստանը մտադիր է Ադրբեջանի միջոցով մեծացնել նավթի արտահանումը՝ շրջանցելով ՌԴ-ին
Քաղաքականություն
11.04.2023 | 13:07
Ղազախստանի նախագահ Կասիմ Ժոմարտ Տոկաևի ու Ադրբեջանի նախագահ Իլհամ Ալիևի՝ նախօրեին Աստանայում տեղի ունեցած բանակցությունների հիմնական թեման եղել է ղազախական նավթը Բաքվի միջոցով միջազգային շուկաներ հասցնելն է ՌԴ-ին շրջանցելով։
«Մեր պայմանավորվածությունների շնորհիվ այս տարի ղազախական նավթի առաջին խմբաքանակն ուղարկվել է Ադրբեջանի տարածքով։ Հաջորդ քայլը մատակարարումների ծավալների ավելացումն ու դրանք երկարաժամկետ, կայուն դարձնելն է»,- ասել է Տոկաևը։ Այսօր էլ Ղազախստանի փոխվարչապետ, առևտրի և ինտեգրման նախարար Սերիկ Ժումանգարինը խոսել է Ադրբեջանով նավթ արտահանելու ծրագրերից, գրում է Kazinform-ը։
«Նախորդ տարի KazMunayGas-ը և SOCAR-ը վերջապես պայմանագիր էին ստորագրել։ 2023 թվականից մենք նախատեսում ենք 1,5 միլիոն տոննա նավթ մատակարարել Բաքու-Թբիլիսի-Ջեյհան նավթամուղով։ Գործընթացն արդեն սկսվել է մարտին, ուղարկվել են առաջին երկու լցանավերը՝ 20 հազար տոննա, իսկ ապրիլի համար՝ 125 հազար տոննա»,-ասել է Ժումանգարինը։ Նա նաև նշել է, որ Բաքուն այլ երթուղիներ ևս առաջարկում է։
«Օրինակ՝ Բաքու-Սուփսա, բայց հիմա մենք հաշվարկում ենք նավթամուղի տեխնիկական բնութագրերը։ Մեծ ծավալներ փոխադրվում են նաև երկաթուղով դեպի Բաթումի և Փոթի նավահանգիստներ։Ամենագլխավոր խնդիրը, որը մենք այժմ ուսումնասիրում ենք, ճանապարհային քարտեզն է՝ ղազախական և ադրբեջանական կողմից տրանսպորտային խոչընդոտները վերացնելու համար»,-ասել է պաշտոնյան՝ հավելելով, որ երեկ քննարկվել է նաև համատեղ ձեռնարկության ստեղծման հարցը, որը կլինի միասնական օպերատոր այդ տարանցիկ երթուղու համար։
Էմմա Չոբանյան
