26.11.2024 | 10:25
Ալիևը զանգահարել է Դոնալդ Թրամփին
Կարո Փայլանը քրդամետ կուսակցության կողմից չի առաջադրվել․ Թուրքիայի ընտրություններին կմասնակցի 26 կուսակցություն
Քաղաքականություն
10.04.2023 | 16:25
Թուրքիայում մայիսի 14-ին խորհրդարանական ընտրություններին մասնակցելու համար 26 քաղաքական կուսակցություններ ներկայացրել են պատգամավորության թեկնածուների ցուցակները։ Այս մասին հայտարարել է Բարձրագույն ընտրական խորհրդի նախագահ (YSK) Ահմեդ Յեները, գրում է Duvar-ը։ Յեները նշել է, որ խորհուրդը ուսումնասիրելու է, թե արդյոք իրենց ցուցակները ներկայացնող կուսակցությունները բավարարում են «Խորհրդարանական ընտրությունների մասին» օրենքի պայմաններին մինչև ապրիլի 11-ը: Ցուցակները չեն կարող վերանայվել ապրիլի 9-ից հետո:
Իշխող Ժողովրդական դաշինքի կուսակցությունները ներկայացրել են իրենց ցուցակները, այդ թվում՝ «Արդարություն և զարգացում» կուսակցությունը (AKP), «Ազգայնական շարժում» կուսակցությունը (MHP), «Մեծ միասնություն» կուսակցությունը (BBP) և «Նոր բարեկեցություն» կուսակցությունը (YRP):
Ընդդիմադիր Ազգային դաշինքի դեպքում «Ուրախություն», «Դեմոկրատական», «DEVA» ու «Ապագա» կուսակցությունները առաջադրել են թեկնածուներ գլխավոր ընդդիմադիր Ժողովրդահանրապետական կուսակցության (CHP) ցուցակով: «İYİ» (Լավ) կուսակցությունը նույնպես ներկայացրել է իր սեփական ցուցակը, սակայն ինը նահանգներում չի առաջադրել որևէ թեկնածու՝ համաձայնեցնելով «CHP»-ի հետ: Այս առումով «CHP»-ն 81 նահանգներից յոթ նահանգներում ոչ մի թեկնածու չի առաջադրել։
Քրդամետ Ժողովուրդների դեմոկրատական կուսակցությունն էլ մասնակցելու է «Կանաչ Ձախ» կուսակցության հովանու ներքո, քանի որ փակվելու վտանգի տակ է։ Կուսակցությունը չի առաջադրել իր ներկայիս պատգամավորներից 33-ին կուսակցության ցուցակով, հիմնականում՝ երկու ժամկետի սահմանափակման պատճառով, նրանց թվում է նաև հայազգի պատգամավոր Կարո Փայլանը։
Էմմա Չոբանյան
