27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
Կովկասյան տարածաշրջանում լարվածությունը ձեռնտու չէ ոչ մի երկրի․ Իրանի ԱԽ քարտուղարը՝ Արմեն Գրիգորյանին
Քաղաքականություն
10.04.2023 | 12:29
ՀՀ Անվտանգության խորհրդի քարտուղար Արմեն Գրիգորյանը նախօրեին աշխատանքային հանդիպում էր ունեցել Իրանի Իսլամական Հանրապետության Ազգային անվտանգության գերագույն խորհրդի քարտուղար Ալի Շամխանիի հետ։
Մեհր գործակալության հաղորդմամբ՝ Շամխանին հանդիպման ընթացքում անդրադարձել է իրանցի և հայ ժողովուրդների պատմական հարաբերություններին և մշակութային կապերին։ «Երկու երկրների քաղաքական և տնտեսական հարաբերությունների կայունությունն ու ամրությունը Թեհրան-Երևան բարեկամական կապերի հիմնական բնութագրիչներից են»,- ասել է նա։ Իրանցի պաշտոնյան նաև նշել է, որ հարևան երկրների հետ համագործակցության ընդլայնումը Իրանի արտաքին քաղաքականության անփոփոխ կանոն է և կառավարության օրակարգում առաջնահերթություն։
«Խաղաղ համակեցությունն ու համատեղ ջանքերով տարածաշրջանային լարվածության վերացումը խաղաղ մեթոդների կիրառմամբ Իրանի առաջարկներն են հակամարտությունների բոլոր կողմերին», -ասել է նա։ Շամխանին ընդգծել է Թեհրան-Երևան տնտեսական փոխգործակցության աճի դրական հեռանկարը՝ հայտարարելով, որ երկկողմ ապրանքաշրջանառության տարեկան 3 միլիարդ դոլարի հասցնելը հասանելի նպատակ է։
«Իրանը և Հայաստանը երկուսն էլ տեղակայված են Հյուսիս-Հարավ միջանցքի երկայնքով, ինչը վառ հեռանկար է բերում մեր երկկողմ առևտրային հարաբերությունների հետագա խորացման համար»,- հավելել է պաշտոնյան։ Շամխանին նշել է, որ Կովկասյան տարածաշրջանում լարվածությունը ձեռնտու չէ ոչ մի երկրի, և որ ցանկացած աշխարհագրական փոփոխություն Հարավային Կովկասի տարածաշրջանում կհանգեցնի տարածաշրջանում լարվածության սրման, ինչը «տարածաշրջանի խաղաղության և անվտանգության թշնամիների պահանջն է»։ Շամխանին ընդգծել է, որ երկխոսությունն ու շարունակվող գործակցությունը պետք է փոխարինեն կոշտ մոտեցումներին՝ վերջ դնելու տարածաշրջանում առկա մարտահրավերներին։
Իրանցի պաշտոնյան հույս է հայտնել, որ «Հայաստանն ու Ադրբեջանը կպահպանեն զսպվածություն և կթոթափեն լավածությունը՝ հենվելով լարվածության ճգնաժամային կառավարման վրա»։
Ըստ իրանական գործակալության՝ Արմեն Գրիգորյանը իր հերթին նշել է Թեհրան-Երևան դարավոր հարաբերությունները, խնդրել էլ ավելի խորացնել և ընդլայնել հարաբերություններն ու համագործակցությունը Իրանի հետ, որը Հայաստանի կառավարության ու ժողովրդի արտաքին քաղաքականության առաջնահերթություններից է։ ՀՀ ԱԽ քարտուղարն ասել է, որ Իրանը կարևոր դեր է խաղում Հարավային Կովկասի տարածաշրջանի երկրների միջև հարաբերությունների ընդլայնման և տարածաշրջանային խաղաղության և կայունության խթանման գործում։ Նա նաև շնորհավորել է Թեհրանի ու Էր- Ռիյադի միջև կնքված համաձայնագրի առթիվ, որով Իրանն ու Սաուդյան Արաբիան վերականգնում են հարաբերությունները։
Արմեն Գրիգորյանը նաև նշել է, որ երկու երկրների համար կարևոր են Թուրքմենստանի հետ էլեկտրաէներգիայի և գազի փոխանակման նախագծերը՝ ընդգծելով, որ տնտեսական նախագծերի իրագործման տեմպերը պետք է արագացվեն։
Էմմա Չոբանյան
