14.09.2026 | 18:19
Փաշինյանն ու Բունդեսթագի պատվիրակությունը քննարկել են Հայաստան–Գերմանիա և Հայաստան–ԵՄ հարաբերությունները
Կացնով հատել են էկոակտիվիստ Թեհմինե Ենոքյանի բալենիների այգին՝ 714 ծառ
Հասարակություն
06.04.2023 | 14:16
«Գնդեվազում 3 տարի առաջ տնկածս երկու հեկտար բալի այգին` շուրջ 714 ծառ, երեկ ամբողջովին կացնով կտրած, ապա կրկին տնկած եմ հայտնաբերել»,- այս մասին Factor.am-ի հետ զրույցում ահազանգեց բնապահպան, ակտիվիստ Թեհմինե Ենոքյանը։
Բնապահպանը, թեև մեզ հետ զրույցում խուսափեց իր կողմից կասկածվող անձի կամ անձանց անունները հնչեցնել, սակայն տեղեկացրեց, որ իր կասկածների մասին արդեն իսկ ոստիկանությանը տեղեկացրել է.
«Քանի դեռ քննչական մարմիններն իրենց ուսումնասիրությունը չեն ավարտել, այս պահին զերծ կմնամ որևէ մեկին մեղադրելուց։ Չեմ բացառում, որ այս ամենը կապված լինի խիստ անձնական կամ հանրային գործունեության հետ, հնարավոր է՝ լինի այն նույն մարդը, որը կրակել էր տանս վրա»,- նշեց նա
Ոստիկանությունից Factor TV-ին փոխանցեցին, որ Ենոքյանի կողմից ՆԳՆ ոստիկանության Ջերմուկի բաժինը երեկ հանցագործության մասին հաղորդում է ստացել, որը փոխանցվել է Քննչական կոմիտե։
«Իմ նկատմամբ կատարվող հետապնդումները շարունակվում են շուրջ մեկ տարի, իսկ ոստիկանությունն ու քննչական մարմինները դատարանի հետ ձեռք ձեռքի տված ոչինչ չեն անում կամ շարունակում են սատարել հանցագործներին»,- հայտարարեց Ենոքյանը։
Հիշեցնենք՝ նախորդ տարի մարտին անհայտ անձինք հրկիզել էին Թեհմինե Ենոքյանի բնակարանի դուռը, նույն թվականի հունիս և հուլիս ամիսներին երկու անգամ կրակել տան ուղղությամբ, ինչի հետևանքով վնասվել էին պատուհանները, առաստաղը և պատը։
Ռոզա Վարդանյան
