Շաբաթօրյակ անելը երբեմն քմծիծաղի է արժանանում, ինչը ողբերգություն է. Նիկոլ Փաշինյան․ ՏԵՍԱՆՅՈՒԹ

Աշխատանքի և սոցիալական հարցերի նախարարությունը «Կամավոր աշխատանքի մասին» օրենքի նախագիծ է մշակել։ Գերատեսչության ղեկավար Նարեկ Սարգսյանը նախագիծն այսօր ներկայացրեց Կառավարության նիստում։ Նրա խոսքով` նոր օրենքը կարգավորում է կամավոր աշխատանքի հետ կապված իրավահարաբերությունները` ստեղծելով միասնական իրվական հիմքեր ՀՀ–ում կամավորության մշակույթի զարգացման և տարածման համար։

Նախագծի ընդունմամբ հնարավորություն է տրվում նպաստել կամավոր աշխատանքի ինստիտուտի և մարդկային կապիտալի զարգացմանը, աշխատանքային փորձառության ձեռքբերմանը, բնականաբար, նաև աշխատաշուկայում անձի մրցունակության բարձրացմանը։ Ըստ այդմ՝ կամավորների համար կամրագրվեն կամավոր աշխատանքի մասին պայմանագիր, տեղեկանք, երաշխավորագիր, կամավոր աշխատանքի ժամանակահատածը` կամավորի համար աշխատանքային փորձառության համարում, ծախսերի հատուցման իրավունք, առողջության և անվտանգության ապահովման երաշխիքներ, ապահովագրության հնարավորություն, կապահովի աշխատաշուկա մուտք գործելու, նոր գիտելիք և մասնագիտական փորձառություն ձեռք բերելու հնարավորություն:

ՀՀ վարչապետ Նիկոլ Փաշինյանն էլ ընդգծեց նախագծի մշակութային ու քաղաքակրթական առանձնահատկությունը։

«Հանրային համերաշխության տեսակետից շատ կարևոր է, որ մարդը որոշակի ժամանակ տրամադրում է կամավոր աշխատանքին։ Դա կարող է լինել խնամքի կենտրոններում, առողջապահական հիմնարկներում, համայնքում շաբաթօրյակ անել կամ կոմունալ ծառայությունների աջակցել, ինչը հիմա մեզանում ընդունված չէ ու նույնիսկ կարող է որոշակի քմծիծաղի արժանանալ, ինչը իրականում ողբերգություն է, ողբերգություն, որի կապը այլ ողբերգությունների հետ մենք ուղղակի չենք տեսնում։ Սա այն դեպքն է, երբ ասված է, որ պիտի նայեք, պիտի նայեք ու պիտի չտեսնեք»,- ասաց Փաշինյանը։

Վարչապետը կարևորեց կամավորության ձևակերպումը թվայնացնելը` դրա հետագծելիությունն ապահովելու համար։
ԿԳՄՍ նախարար Ժաննա Անդրեասյանն էլ հավելեց, որ առաջիկայում նախատեսվում է բուհերի ընդունելության կարգում կամավորական աշխատանքը դարձնել պարտադիր բաղադրիչ։

Քննարկման ավարտին կառավարությունը հավանություն տվեց «Կամավոր աշխատանքի մասին» օրենքի նախագծին և հարակից օրենքներում փոփոխություններ և լրացումներ կատարելու մասին նախագծերի փաթեթին։ Այն առաջիկայում կներկայացվի խորհրդարանի դատին։

Մանրամասները՝ տեսանյութում։