«Սակուրա ծառատեսակը բացակայում է ՀՀ-ում աճող ծառերի և թփերի ցանկից». Գլխավոր դատախազություն դիմում է ուղարկվել

«2018 թվականի փետրվարի 8-ին Հայաստանի Հանրապետության կառավարության թիվ 108-Ն որոշմամբ հաստատվել են «Բնակավայրերի կանաչ գոտիների չափերին և տեսակային կազմին ներկայացվող պահանջները»։
Նշված որոշման հավելվածի 7-րդ գլխով հաստատվել է Հայաստանի Հանրապետությունում աճող ծառերի և թփերի ցանկը, որտեղ «Prunoideae» ենթաընտանիքին դասվող «սակուրա» հավաքական անվանմամբ ծառատեսակը բացակայում է»,- այս մասին Factor.am-ի հետ զրույցում ասաց իրավաբան Սրբուհի Ղազարյանը։

Այսօր «Ընդդեմ իրավական կամայականությունների» ՀԿ-ի անունից Ղազարյանը դիմում է ուղարկել Գլխավոր դատախազություն, իր խոսքով՝ ծառահատումների մասով մի քանի խնդրահարույց հիմքեր մատնանշելով։ Սրբուհի Ղազարյանը Երևան քաղաքի Մոսկովյան փողոցի բնակիչներից է, Երևանի քաղաքապետարանը նախորդ շաբաթ հենց այս փողոցից էր սկսել ծառահատումները։ Ղազարյանն առաջիններից էր, որ բողոքի ձայնն էր բարձրացրել, այս անգամ Դատախազության ուշադրությունը հրավիրելով մի շարք հանգամանքների.

««Շրջակա միջավայրի վրա ազդեցության գնահատման և փորձաքննության մասին» ՀՀ օրենքի համաձայն, Երևանի քաղաքապետարանի և «Կանաչապատում և շրջակա միջավայրի պահպանություն» ՀՈԱԿ-ի նախաձեռնած միջոցառումները դասվում են շրջակա միջավայրի վրա ազդեցության գնահատման և փորձաքննություն (ՇՄԱԳ) պահանջող գործունեության տեսակների շարքին։ Հետևաբար՝ այս կապակցությամբ, Գլխավոր դատախազությանը խնդրել ենք նախաձեռնել ուսումնասիրություն ՀՀ քրեական օրենսգրքի «Աշխատանքներ իրականացնելիս շրջակա միջավայրի պահպանության օրենսդրության պահանջները խախտելու» մասին հոդվածի առևերույթ հանցակազմ պարունակելու վերաբերյալ»,- նշում է Ղազարյանը։

Գերատեսչություն ուղարկված դիմումում քաղաքացիները խնդրել են ուսումնասիրել նաև «Կանաչապատում և շրջակա միջավայրի պահպանություն» ՀՈԱԿ-ի կողմից հանրայնացրած արձանագրության հանգամանքները՝ հատկապես ՀՀ քրեական օրենսգրքի «Պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը» և «Պաշտոնեական կեղծիքը» հոդվածներով նախատեսված հանցակազմի տարրեր պարունակելու հավանականության նպատակով։

«Պետք է ուսումնասիրություն անցկացվի՝ «Կանաչապատում և շրջակա միջավայրի պահպանություն» ՀՈԱԿ-ի գործողություններում ՀՀ քրեական օրենսգրքի «Էկոցիդ» և «Ծառերը, թփերը կամ բուսածածկն ապօրինի հատելը կամ ապօրինի ձեռք բերված կոճղերը, ծառերը կամ թփերը տեղափոխելը» հոդվածներով նախատեսված հանցակազմի տարրեր պարունակելու վերաբերյալ»,- ահազանգում է մտահոգ քաղաքացին։

Գլխավոր դատախազությունից Factor.am-ին փոխանցեցին, որ կազմակերպության կողմից ուղարկված դիմումը ստացել են՝ այլ մանրամասներ չհայտնելով։

Հիշեցնենք՝ մարտի 23-ին Երևանի կենտրոնում մի քանի տասնյակ ծառեր հատվեցին՝ ճապոնական տեսակի նոր ծառեր տնկելու պատճառաբանությամբ։ Ծառերի փոխարինման ծրագրով գնվել է 130 սակուրա, յուրաքանչյուրն արժե 71.400 դրամ՝ այս մասին FactorTV-ին տեղեկացրել էին ՀՈԱԿ-ից։ Ստացվում է՝ 130 սակուրա գնելու համար հարկատուների գրպանից ծախսվել է ավելի քան 9 մլն դրամ։

Մասնագետները, մինչդեռ, հակադարձում են՝ սակուրան չունի խիտ սաղարթ, ծաղկում է ընդամենը 15 օր, իսկ ծառահատված թեղին լայնասաղարթ է, օժտված է սանիտարական ամենաբարձր հատկանիշներով ու ամենահամապատասխանն է Երևանի պայմաններին, կլանում է փոշին, որը վերջին ժամանակներում հատկապես կենտրոնում գերազանցում է սահմանային թույլատրելի կոնցենտրացիան։

Ռոզա Վարդանյան