23.02.2026 | 23:30
Ադրբեջանը նույնպես հետաքրքրություն է հայտնել Եվրոպական խաղաղության գործիքակազմի շրջանակներում օգնություն ստանալու հարցում
Իրանին մեղադրելուց հետո Բաքուն կրոնական ակտիվիստների է ձերբակալել Մեջլիսի պատգամավորի դեմ զինված հարձակման կասկածանքով
Քաղաքականություն
03.04.2023 | 14:44
Ադրբեջանի Միլի Մեջլիսի պատգամավոր Ֆազիլ Մուստաֆայի դեմ իրականացված զինված հարձակման գործով վեց մարդ է ձերբակալվել։ Այս մասին հայտնում է ադրբեջանական ԱՊԱ գործակալությունը՝ վկայակոչելով իր աղբյուրներին։
Տեղեկությունների համաձայն՝ քրեական գործով կալանավորվել է 6 անձ, այլ անձանց նկատմամբ հետաքննություն է տարվում։
Հավելենք, որ Ադրբեջանի ՆԳՆ-ն նախօրեին լրատվամիջոցներին հայտնել էր, որ Մուստաֆայի գործով 4 անձ է ձերբակալվել։ Գերատեսչությունից նշել էին, որ ավելի ուշ հանրությանը կտրամադրվի մանրամասն տեղեկատվություն։ Առայժմ ձերբակալվածների ինքնությունը և հանցագործության ենթադրյալ դրդապատճառները չեն բացահայտվում։ Լրատվականները նաև նշում են, որ ձերբակալման գործողությունը տեղի է ունեցել Գարադաղի շրջանում։
Ըստ տեղեկությունների՝ ձերբակալվածները կրոնական ակտիվիստներ են։ Երեքի ինքնությունը հայտնի է՝ Սարիջանով Ազեր Քյամրանօղլու, Ասկերով Էլշադ Թոֆիգօղլու և Շիրինով Սաբուհի Վելյադդինօղլու։ Ազեր Սարիջանովը հայտնի է որպես «հաջի ազեր», յութուբում նաև հրապարակումներով է հանդես գալիս։ Նա 1993-2002 թվականներին կրոնական կրթություն է ստացել Իրանի Կում քաղաքում։ Սաբուհի Շիրինովը ևս կրոնական ակտիվիստ է, բազմիցս եղել է Իրանում։
Հիշեցնենք, որ օրերս Ադրբեջանի ԱԳՆ-ն պատգամավորի դեմ իրականացված զինված հարձակման մեջ մեղադրել էր Իրանին։
«Միլի Մեջլիսի պատգամավոր Ֆազիլ Մուստաֆայի դեմ կատարված ահաբեկչության հետաքննության նախնական արդյունքները մատնանշում են Իրանին»,- ասել էր Ադրբեջանի ԱԳՆ խոսնակ Այխան Հաջիզադեն։
Մարտի 28-ի երեկոյան Ադրբեջանի Միլի Մեջլիսի պատգամավոր Ֆազիլ Մուստաֆան իր տան մոտ զինված հարձակման էր ենթարկվել՝ վիրավորում ստանալով ուսի և ոտքի շրջանում։ Մուստաֆայի կյանքին վտանգ չի սպառնում։ Դեպքից անմիջապես հետո ադրբեջանցի տարբեր պատգամավորներ առանց հիմնավորումների սկսեցին պնդել, որ Իրանն է կանգնած հարձակման հետևում։ Նման վարկած սկսեցին շրջանառել նաև ադրբեջանական քարոզչական լրատվականները։ Ադրբեջանի պետանվտանգության ծառայությունը պատգամավորի դեմ հարձակումն անմիջապես «ահաբեկչություն» որակեց։
Էմմա Չոբանյան
