Տուապսեում ԱԹՍ-ի հարձակումից հետո «Ռոսնեֆտ»-ի նավթային պահեստում հրդեհ է բռնկվել

ՌԴ Կրասնոդարի երկրամասի Տուապսե քաղաքում նավթի պահեստում հրդեհ է բռնկվել։ Այս մասին հայտնել են քաղաքային վարչակազմից, գրում է Meduza-ն։

Նշվում է, որ հրդեհը սկսվել է մոտավորապես ժամը 2-ին Ինդուստրիալնայա փողոցում, որտեղ, ըստ բաց տվյալների, գտնվում է «Ռոսնեֆտ» ընկերության նավթավերամշակման գործարանը։ Տեղի բնակիչները լսել են, թե ինչպես է նավթապահեստի տարածքում մի քանի վայրկյան տարբերությամբ երկու պայթյուն որոտացել։

Astra-ն պնդում է, որ «երկու չհաստատված անօդաչուներ» հարձակվել են տարածքի վրա, վնասվել է կաթսայատունը։ «Baza» և «Shot» Telegram-ալիքները նույնպես պնդում են, որ նավթի պահեստի վրա հարձակվել են պայթուցիկներով լցված անօդաչու թռչող սարքերով, որոնք ընկել են նավթի պահեստից 100 մետր հեռավորության վրա։

ԱԻ ծառայությունում ՌԻԱ Նովոստիի աղբյուրն էլ հայտնել է, որ նավթի պահեստի շրջանում «անօդաչու է ֆիքսվել»։ Իշխանություններն այս տեղեկությունները չեն մեկնաբանել։

Տուապսեի քաղաքապետարանից հայտնել են, որ հրդեհը բռնկվել է տնտեսական շենքում, իսկ հրդեհի տարածքը կազմել է առնվազն 200 ք/մ։ Գիշերը ժամը երեքին հրդեհը մարվել է։

Տուապսեի քաղաքապետարանը, ինչպես նաև ԱԻՆ մարզային վարչության մամուլի ծառայությունը հայտնել են, որ հրդեհը չի ազդել նավթի տանկերների վրա, նավթամթերքի արտահոսք չի եղել, տուժածներ չկան։ Տարածաշրջանային ԱԻՆ-ի առավոտյան հաղորդագրության մեջ, սակայն, Տուապսեում տեղի ունեցած միջադեպը չի հիշատակվում։

Էմմա Չոբանյան