12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Սերբիան և Կոսովոն համաձայնել են հարաբերությունների կարգավորման ԵՄ-ի ծրագրին
Քաղաքականություն
28.02.2023 | 14:04
Սերբիայի և Կոսովոյի ղեկավարները սատարել են ԵՄ-ի առաջարկած «Հարաբերությունների կարգավորման ուղու մասին» համաձայնագիրը, սակայն մարտին լրացուցիչ բանակցություններ կպահանջվեն՝ համաձայնեցնելու դրա ընդունման և իրականացման բոլոր մանրամասները։ Այս մասին ասել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը։
«Ուրախ եմ հայտնել, որ Սերբիայի և Կոսովոյի ղեկավարները ցուցաբերել են պատասխանատու մոտեցում և լուծումներ գտնելու պատրաստակամություն»,- ասել է Բորելը՝ ընդգծելով, որ կողմերը մինչ այժմ միայն «պատրաստակամություն են հայտնել սկսելու համաձայնագրի իրագործումը», սակայն ավելի շատ աշխատանք է պետք և հետագա բանակցություններ։
Նրա խոսքով՝ երկու կողմերը խոստացել են չձեռնարկել միակողմանի միջոցներ, որոնք կարող են հանգեցնել լարվածության և վտանգել համաձայնագրի կնքումը։
Կոսովոյի վարչապետ Ալբին Կուրտին բանակցություններից հետո հայտարարել է, որ պատրաստ էր ստորագրել համաձայնագիրն արդեն փետրվարի 27-ին, հայտնում է Reuters-ը։
Սերբիայի նախագահ Ալեքսանդր Վուչիչը, սակայն, հակադարձել է՝ հայտարարելով, որ դա իրատեսական չէ, և որ անհրաժեշտ են հետագա խորհրդակցություններ։
«Դա երկար, դժվար և հոգնեցուցիչ գործընթաց է։ Ես հույս ունեի, որ մենք կարող ենք համաձայնության գալ որոշ փոխզիջումների շուրջ, սակայն պարոն Կուրտին պատրաստ չէր դրան»,- Վուչիչի խոսքերն է մեջբերում AP-ն։
Բանակցություններից հետո Բորելը լրագրողներին ասել է, որ քանի որ կողմերը համաձայնել են համաձայնագրի տեքստին, ԵՄ-ն որոշել է այն հրապարակել։ Փաստաթուղթը բաղկացած է 11 կետից։ Դրանում ասվում է, որ կողմերը պայմանավորվել են «զարգացնել միմյանց հետ նորմալ, բարիդրացիական հարաբերություններ՝ հավասարության հիման վրա», «ճանաչել իրենց համապատասխան փաստաթղթերն ու ազգային խորհրդանիշները», «ծագած վեճերը լուծել բացառապես խաղաղ ճանապարհով» և չփակել Եվրամիություն տանող միմյանց ճանապարհը։
Տաթև Ֆռանգյան
