«Հաշմանդամություն ստացած զինծառայողներին փոխհատուցումը ամբողջ կյանքի համար տվեք, ամոթ ա, էլի»․ Նազարյան․ ՏԵՍԱՆՅՈՒԹ

ԱԺ այսօրվա նիստում քննարկվում է «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում փոփոխություններ և լրացումներ կատարելու մասին» օրենքի նախագիծը։

«Հայաստան» խմբակցության պատգամավոր Գեղամ Նազարյանը հորդորեց․ «Խնդրում եմ հաշվի առել, որ մենք հիմա չենք խոսում ավտովթարի հետևանքով կամ աշխատավայրում անվտանգության նորմերի խախտման հետևանքով հաշմանդամություն ստացած մարդկանց մասին, այլ խոսում ենք նրանց մասին, ովքեր վիրավորվել են մեր հայրենիքը պաշտպանելիս։ Բոլորին խնդրում եմ՝ այս մարդկանց մի՛ շփոթեք ընդհանուր հաշմանդամություն ունեցողների հետ։

160-ի մարդու մասին է խոսքը, հետո թող լինի 300, բայց պետությանն ի՞նչն է խանգարում, որ այս մարդիկ ստանան այնքան գումար, ինչքան ստանում էին։ Թող հրաշք կատարվի, և բոլոր հաշմանդամներն առողջանան, բայց նրանց ողջ կյանքի համար պետք է այդ գումարը հատկացնել։ Ավարտենք այս քննարկումները։ Ամոթ է մեր պետության համար, որ քննարկում ենք ու հետն էլ ասում ենք՝ 30 հազար թոշակ են ստանալու։ Լավ էլի»։

ՀՀ աշխատանքի և սոցիալական հարցերի նախարարի տեղակալ Դավիթ Խաչատրյանը պատասխանեց․ Ունենք գիտակցում, թե ում հետ գործ ունեն, և չպետք է կասկածել, թե այդ մարդկանց հավասարեցնում ենք այլ դեպքերով հաշմանդամություն ձեռքբերածների հետ։ Առաջին, երկրորդ խմբի հաշմանդամներին հիմնադրամի կողմից հատուցում կտրմադրվի, իսկ երրորդ խմբի հաշմանդամություն ունեցողներին պարգևավճար և կենսաթոշակ, ամեն մեկի համար սահմանված են չափեր։ Դուք ուզում եք, որ երրորդ խմբի հաշմանդամություն ձեռքբերածներն էլ լինեն հիմնադրամի շահառու․ Ձեր առաջարկը կարող ենք քննարկել»։

Գեղամ Նազարյանն արձագանքեց․ «Այդ օրենքը Վեներեյից կամ Մարսից չեն գալիս մեզ պարտադրում, մենք ենք գրում։ Պետության համար դա մեծ ծանրաբեռնվածություն չէ։ 3-րդ խմբի հաշմանդամ դարձածները կարող էին և զոհվել, և իրենց ընտանիքները փոխհատուցում էին ստանալու։ Հիմա ի՞նչն է խանգարում, որ կենդանի հերոսներին արժևորենք, և նրանց տրվող այդ գումարները պահպանվեն»։

Մանրամասները՝ տեսանյութում։