27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
ԵՄ-ն մանրամասնել է ՌԴ-ի դեմ պատժամիջոցների 10-րդ փաթեթի բովանդակությունը
Քաղաքականություն
27.02.2023 | 17:09
Բրյուսելում տեղի ունեցած ճեպազրույցում հրապարակվել է Ուկրաինայի դեմ ռուսական պատերազմի պատճառով ԵՄ պատժամիջոցների 10-րդ փաթեթի բովանդակությունը, որն ընդունվել է շաբաթավերջին։ Հայտնի է դարձել, որ ԵՄ-ն արգելելու է Ռուսաստանի քաղաքացիներին պաշտոններ զբաղեցնել ԵՄ-ի կարևոր ենթակառուցվածքային ձեռնարկությունների կառավարման մարմիններում, ինչպես նաև կփակի ռուսական ընկերությունների մուտքը ԵՄ երկրներում գազի պահեստարաններ, հայտնում է DW-ի ռուսական ծառայությունը։
Բացի այդ, Եվրամիությունը ներկայացնում է սառեցված ակտիվների վերաբերյալ հաշվետվության նոր կանոններ. այժմ դրանք վերաբերում են ոչ միայն մասնավոր, այլև Ռուսաստանի Դաշնության պետական ակտիվներին: Այս կերպ Բրյուսելը մտադիր է բացահայտել դրանց գտնվելու վայրը։
Ներդրված է նաև տեղեկատվության արտահոսքի հետևանքով պատժամիջոցների կիրառման ակնկալիքով ակտիվների վաճառքի փորձերի մասին հաշվետվություն ներկայացնելու պարտավորությունը։ Դրա խախտումը կարող է հանգեցնել քրեական հետևանքների, ասել է ԵՄ բարձրաստիճան պաշտոնյան Բրյուսելում կայացած ճեպազրույցում։
Չարթերային չվերթներ իրականացնող ընկերություններից կպահանջվի լրացուցիչ տեղեկատվություն տրամադրել՝ կանխելու պատժամիջոցների տակ գտնվող ռուսաստանցիների մուտքը ԵՄ տարածք։ Արգելք կսահմանվի ԵՄ-ից երրորդ երկրներ երկակի նշանակության ապրանքների տարանցման համար՝ կանխելու Ռուսաստան և, որպես հետևանք, Ուկրաինայի մարտադաշտ դրանց հասնելը։
Էմբարգո է սահմանվել ռուսական բիտումի և ասֆալտի, ինչպես նաև սինթետիկ կաուչուկի վրա։ Վերջինիս համար նախատեսված է 16 ամիս անցումային շրջան, որպեսզի այն գնող երկրներն աստիճանաբար անցում կատարեն այլ մատակարարներից գնումների։
Տաթև Ֆռանգյան
