14.12.2025 | 11:41
Ապարանի համայնքապետարանը՝ քամու պատճառած վնասների մասին
Երկրաշարժից հետո Թուրքիայում կոչ են անում ֆուտբոլային հանդիպումներն անցկացնել առանց հանդիսատեսի՝ կառավարության հրաժարականի կոչերի և բողոքի ակցիաների պատճառով
Քաղաքականություն
27.02.2023 | 22:47
Թուրքիայում ֆուտբոլային հանդիպումների ժամանակ երկրպագուները տարբեր բողոքի ակցիաներ են կազմակերպել երկրում ավերիչ երկրաշարժերից հետո։ Մասնավորապես, փետրվարի 25-ին անցկացված խաղի ժամանակ «Ֆեներբահչե»-ի երկրպագուները կարգախոսներ են վանկարկել՝ կոչ անելով իշխող «Արդարություն և զարգացում» կուսակցության կառավարությանը հրաժարական տալ՝ երկիրը երկրաշարժերին չպատրաստելու պատճառով։
Ֆեներբահչե-Կոնիասպոր հանդիպման ընթացքում երկրպագուները բացականչել են՝ «Կառավարություն, հրաժարակա՛ն տուր», «Ստի փաթեթ, արդեն 20 տարի։ Հրաժարակա՛ն տվեք»։
Հեռարձակող Bein Sports-ը երկրապագուների վանկարկումների ժամանակ իջեցրել է ձայնը։
Նախօրեին էլ «Բեշիքթաշ» ֆուտբոլային ակումբի երկրպագուներն են հանդիպման ժամանակ բողոքել կառավարության դեմ։ Ամբողջ խաղի ընթացքում Ստամբուլի Vodafone Arena-ում երկրպագուները վանկարկել են կարգախոսներ՝ կոչ անելով կառավարությանը հրաժարական տալ:
Խաղերից հետո Թուրքիայի «Ազգայնական շարժում» կուսակցության նախագահ Դևլեթ Բահչելին, որը նաև նախագահ Ռեջեփ Թայիփ Էրդողանի կոալիցիոն գործընկերն է, հայտարարություն է տարածել՝ նշելով, որ կառավարության դեմ բողոքի ցույցերն անհարգալից վերաբերմունք են «երկրաշարժի հետևանքով զոհերի նկատմամբ»։
«Խաղերը կա՛մ պետք է անցկացվեն առանց երկրպագուների, կա՛մ պետք է ձեռնարկվեն անհրաժեշտ միջոցներ»,- ասվում է հայտարարության մեջ։
Բահչելիից հետո ներքին գործերի նախարար Սուլեյման Սոյլուն է թիրախավորել երկրպագուներին։
«Նրանք, ովքեր ցանկանում են սպորտային դաշտերը վերածել քաղաքական ասպարեզի, թող լսեն պետության ու ազգի ջանքերը, թող չխանգարեն մեր աշխատանքին։ Ոչ ոք չպետք է պայքարի Թուրքիայի անվտանգության դեմ»,- ասել է նա։
Էմմա Չոբանյան
