Ենթադրենք՝ վարչապետը, նախագահը հոգեկան խնդիրներ ունեն, ո՞նց տիրապետեն պետական գաղտնիքին․ Արծվիկ Մինասյան․ ՏԵՍԱՆՅՈՒԹ

«Պատկերացնենք, որ օրենքով նախատեսված պաշտոնատար անձինք այս պահանջների տակ են, օրինակ տառապում են կառավարության կողմից սահմանված հիվանդությունների ցանկի հիվանդություններից որևէ մեկով»,-Պետաիրավական հարցերի մշտական հանձնաժողովում հայտարարեց «Հայաստան» խմբակցության քարտուղար Արծվիկ Մինասյանը՝ ելույթ ունենալով «Պետական գաղտնիքի մասին» օրենքի նոր նախագծի քննարկման ժամանակ:

Ընդդիմադիր պատգամավորն անընդունելի համարեց, որ ՀՀ վաչապետը, Նախագահը և ԱԺ նախագահը նախագծով սահմանափակում չունեն պետական գաղտնիքին հասանելիություն ունենալու և օգտագործելու հարցում, իսկ որոշ խումբ մարդիկ, օրինակ՝ պատգամավորներն ունեն:

Միանսյանն ընթերցեց օրենքի նախագծի համապատասխան դրույթը, որում ասվում է. «Պետական գաղտնիք պարունակող տեղեկություններին առնչվելու թույլտվության տրամադրումը Հայաստանի Հանրապետության քաղաքացուն, օտարերկրյա քաղաքացուն եւ քաղաքացիություն չունեցող անձին մերժվում է, եթե օրենսդրությամբ սահմանված կարգով նա ունի դիտավորությամբ կատարված ծանր կամ առանձնապես ծանր հանցագործությունների համար դատվածություն կամ այդպիսի հանցագործություն կատարելու համար նրա նկատմամբ հարուցված է քրեական հետապնդում, նա տառապում է Հայաստանի Հանրապետության կառավարության կողմից հաստատված ցանկում ընդգրկված այնպիսի հիվանդությամբ, որի առկայությունը խոչընդոտում է պետական գաղտնիք պարունակող տեղեկությունների օգտագործմամբ աշխատանքներ կատարելուն և այլն»:

Մինասյանը նաև հրապարակեց սահմանափակում ենթադրող հիվանդությունների ցանկը․ հոգեկան հիվանդություններ, մտագարություն, շիզոֆրենիա, մոլուցքահարություն, ընկճվածության հոգեգարություններ, անձի ախտահար պաթոլոգիկ զարգացում, ընկնավորություն, հետվնասվածքային էնցֆալոպատիա, խրոնիկ ալկոհոլիզմ, թմրամոլություն։

«Ինչպե՞ս պետք է անձինք հավաստիանան, որ պաշտոնյաները չեն տառապում այս հիվանդությամբ կամ նրանց նկատմամբ հարուցված է եղել քրեական վարույթ՝ առանձնապես ծանր հանցագործությունների մասով, բայց ԱԺ-ն որոշել է, որ այդ մարդը պետք է դառնա վարչապետ, նախագահ կամ ԱԺ նախագահ։

Եթե այլ հավասար պայմաններում մերժվում է գաղտնի տեղեկատվության տրամադրումն այդ տիպի անձանց,  բայց այդ երեք պաշտոնյաներն իրականում այդ  սահմանափակումների ներքո են, ապա ինչպե՞ս պետք է այն բացահայտվի և ինպե՞ս պետք է կասեցվի պետական գաղտնիքից օգտվելու կամ այն օգտագործելու իրավունքը»,- դիմելով ԱԱԾ տնօրենի տեղակալ Տիգրան Հարությունյանին՝ հարցրեց պատգամավորը՝ նկատելով՝ նոր օրենքն այդ հարցի լուծումը չի տալիս:

Տիգրան Հարությունյանը պատասխանեց, որ անձինք, որոնք հասնում են այդ պաշտոնին, անցնում են բազմաթիվ ֆիլտերի միջով և ընտրվում է ժողովուրդը․ «Նրանք ունեն փորձ, փողոցից պատահական մարդիկ չեն նշված պաշտոնների գալիս»։

Մանրամասները՝ տեսանյութում։