07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
«Աշխարհն առանց Ռուսաստանի մեզ պետք չէ». Մեդվեդևը սպառնացել է ապոկալիպսիսով
Քաղաքականություն
27.02.2023 | 11:47
ՌԴ Անվտանգության խորհրդի փոխնախագահ, նախկին նախագահ Դմիտրի Մեդվեդևը հայտարարել է, որ եթե Ռուսաստանի գոյության հարցը ծագի, ապա «մարդկային քաղաքակրթության գոյությունը նույնպես հարցականի տակ կդրվի»։ Այս մասին նա գրել է «Իզվեստիա»-ում հրապարակված իր հոդվածում։
«Եթե լրջորեն ծագի Ռուսաստանի գոյության հարցը, ապա այն չի լուծվի միայն ուկրաինական ճակատում, այլ ամբողջ մարդկային քաղաքակրթության հետագա գոյության հարցի հետ մեկտեղ: Եվ այստեղ երկիմաստություն չպետք է լինի: Աշխարհն առանց Ռուսաստանի մեզ պետք չէ»,- գրել է Մեդվեդևը։ Ըստ նրա՝ «Ռուսաստանի թշնամիները» զենքով ապահովում են «Կիևի ռեժիմին»՝ դրանով իսկ խոչընդոտելով Մոսկվայի և Կիևի հնարավոր բանակցություններին։
«Մեր թշնամիները հենց դա էլ անում են՝ չցանկանալով հասկանալ, որ իրենց նպատակներն ակնհայտորեն հանգեցնում են տոտալ ֆիասկոյի: Կորուստ բոլորի համար: Փլուզման։ Ապոկալիպսիս»,– հավելել է ՌԴ-ի նախկին ղեկավարը։ Ըստ Մեդվեդևի, Ռուսաստանը թույլ չի տա նման սցենար։
«Արևմտյան երկրներն իրենց արբանյակներով կազմում են աշխարհի բնակչության ընդամենը 15%-ը: Մենք շատ ավելի շատ ենք, և մենք շատ ավելի ուժեղ ենք: Մեր մեծ երկրի հանգիստ ուժը և նրա գործընկերների հեղինակությունը մեր ողջ աշխարհի ապագայի պահպանման բանալին են»,- գրել է Մեդվեդևը։
Ավելի վաղ Մեդվեդևը հայտարարել էր Լեհաստան հասնելու անհրաժեշտության մասին՝ «սպառնալիքի սահմանները» Ռուսաստանի Դաշնությունից հեռացնելու համար։
Տաթև Ֆռանգյան
