Քաղաքականություն
25.02.2023 | 19:02«Ամուլսարի հարցը քաղաքակրթական է, մենք ընտրեցինք ոչ թե մարդուն, այլ փողը: 21-րդ դարում մենք առաջնորդվում ենք 19-րդ դարի սկզբունքներով: Եթե քեզ համար մեծագույն արժեքը մարդն է, դու անում ես այնպես, որ նա ապրի հարմար, առողջ պայմաններում: Մենք գտնվում ենք ռուսական քաղաքակրթության շրջանակում. Ռուսաստանն էլ անհագորեն սպառում է իր ռեսուրսները: Մեր դրախտային երկիրը մեր ձեռքով վերածում ենք դժոխքի»,- Factor TV-ի հետ զրույցում նման տեսակետ է հայտնում Երևանի պետական տիկնիկային թատրոնի գեղարվեստական ղեկավար Ռուբեն Բաբայանը՝ անդրադառնալով օրերս հայտնի դարձած տեղեկությանը, որ Կառավարությունը թույլ է տալու Ամուլսարի հանքի շահագործումը:
Նրա խոսքով՝ ամենևին նշանակություն չունի՝ ով է լինելու հանքի տերը. այլապես դա կլիներ, այսպես ասած, ընտրովի բնապահպանություն։
«Այսօր մենք ընտրեցինք շտապ գումար ձեռք բերելու ճանապարհը, մինչդեռ մի քանի տարուց այդ գումարը կարող է պետք չգալ, երկիրը կարող է անվերականգնելի վնասներ կրել»,- նշում է նա:
Ռուբեն Բաբայանը խոսում է նաև մեր պետության առջև ծառացած մարտահրավերների և հանրության շրջանում տիրող ապատիկ տրամադրությունների մասին. «Մենք շարունակում ենք սպասել փրկիչների, որոնք դրսից են գալու, մինչդեռ փրկությունը ներսից պետք է լինի: Հետո մենք անիծում ենք այդ փրկիչներին, նորերին ենք բերում, որոնց սպասվում է նույն ճակատագիրը: Մենք կհաղթահարենք պարտվածի հոգեբանությունը, երբ դադարենք ատել ինքներս մեզ: Մենք փորձում ենք մեղավորներին որոշել մեր ատելության չափով, իսկ ատելությունն անջատում է ուղեղը»:
Մանրամասները՝ տեսանյութում:
Աննա Բաբաջանյան
