14.01.2025 | 16:47
Ավինյանը հոր՝ «Օպել»-ի վարորդներին «համբալ» ասելուց հետո հրաժարական չտալու մասին․ ՏԵՍԱՆՅՈՒԹ
Թուրքիայում տասնյակ փաստաբաններ բողոք են ներկայացրել Էրդողանի և նախարարների դեմ՝ երկրաշարժի ավերվածությունների մեջ դերակատարության համար
Քաղաքականություն
22.02.2023 | 22:13
Թուրքիայում 61 փաստաբաններ բողոք են ներկայացրել նախագահ Ռեջեփ Թայիփ Էրդողանի և նրա կառավարության նախարարների, ինչպես նաև հզոր երկրաշարժից տուժած երկրի հարավային շրջանների նահանգապետերի, քաղաքապետերի և կապալառուների դեմ, գրում է Turkish Minute-ը։
Երկրի հարավային և հարավարևելյան 11 նահանգները փետրվարի 6-ին տուժել են 7,8 և 7,5 մագնիտուդով երկու հզոր երկրաշարժերից, որոնց հետևել են բազմաթիվ հետցնցումներ։ Իսկ Հաթայում, որը երկրաշարժից ամենաշատ տուժած շրջաններից է, երկուշաբթի 6,4 մագնիտուդով երկրաշարժ է տեղի ունեցել, որին հաջորդել են հետցնցումներ, այդ թվում՝ 5,8 մագնիտուդով, ինչը հանգեցրել է նահանգում նոր ավերածությունների ու ևս վեց զոհի:
Հալքչը Հուկուկչուլար (Ժողովրդական իրավագետներ) անունով հայտնի փաստաբանական խմբի կոչից հետո փաստաբանները բողոքներ են ներկայացրել Անկարայի գլխավոր դատախազություն։
«Մեր խմբին առընթեր 61 փաստաբան քրեական մեղադրանք է ներկայացրել պաշտոնյաների, այդ թվում՝ նախագահ Ռեջեփ Թայիփ Էրդողանի դեմ՝ երկրաշարժի հետևանքների համար նրանց պատասխանատվության ենթարկելու համար»,- ասվում է հայտարարության մեջ։
Բողոքներ են ներկայացվել նաև Էրդողանի աշխատակազմի հասարակության հետ կապերի պատասխանատու Ֆահրեթթին Ալթունի, ինչպես նաև որոշ GSM օպերատորների դեմ, որոնք դադարեցրել են իրենց գործունեությունը երկրաշարժերից հետո՝ զրկելով փլատակների տակ մնացած մարդկանց օգնություն խնդրելու հնարավորությունից։
Բողոքի սուբյեկտները մեղադրվում են սպանության, անփութության հետևանքով մեկից ավելի անձանց մահվան կամ վիրավորվելու, պաշտոնեական սխալ վարքագծի, հաղորդակցության արգելափակման, հանրային մրցույթների ժամանակ խարդախության և այլ հանցանքների մեջ։
Հայցում Էրդողանին քննադատում են նախագահի իր պարտականությունները չկատարելու համար՝ չապահովելու, որ երկիրը պատրաստված լիներ երկրաշարժերին և շենքերը սեյսմակայուն լինեին։
Էրդողանը և նրա կառավարությունը քննադատության են ենթարկվում հզոր երկրաշարժերին ուշ արձագանքելու և որոնողափրկարարական աշխատանքների համակարգման բացակայության պատճառով, ինչը հանգեցրել է զոհերի թվի աճի։
Էմմա Չոբանյան
