24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
Մոլդովայի սահմանին ռազմական սցենարների ռիսկեր չկան, բայց պետական հեղաշրջման վտանգ առկա է․ ԱԳՆ ղեկավար
Քաղաքականություն
22.02.2023 | 15:15
Մոլդովան երկրի սահմանին կարճաժամկետ հեռանկարում ռազմական սցենարների վտանգ չի տեսնում, սակայն կան հիբրիդային դիվերսիաների և պետական հեղաշրջման վտանգներ։ Այս մասին հայտարարել է երկրի ԱԳ նախարար Նիկոլայ Պոպեսկուն, գրում է Financial Times-ը։
«Մոտ ապագայում ռազմական սցենարների վտանգ չենք տեսնում Մոլդովայի սահմանին՝ ուկրաինական դիմադրության և տոկունության շնորհիվ: Բայց հիբրիդային դիվերսիոն գործողությունների, հեղաշրջման փորձի ռիսկեր, այո՛, կան»,- ասել է նախարարը:
Պոպեսկուն նաև մոլդովացի օլիգարխ, ընդդիմադիր «Շոր» կուսակցության առաջնորդ Իլան Շորին մեղադրել է Քիշնևի դեմ Կրեմլի աջակցությամբ հիբրիդային պատերազմ վարելու մեջ:
Հիշեցնենք, որ ավելի վաղ Մոլդովայի վարչապետ Դորին Ռեչանը հայտարարել էր, որ Ռուսաստանը ծրագրում է գրավել Քիշնևի օդանավակայանը և այնտեղ տեղափոխել իր զինվորականներին։
Երկրի նախագահ Մայա Սանդուն հայտարարել է, որ Ռուսաստանի Դաշնությունը ծրագրում է պետական հեղաշրջում իրականացնել Մոլդովայում ընդդիմության բողոքի ցույցերի օգնությամբ և զինվորական պատրաստվածություն ունեցող մարդկանց ներգրավմամբ։
Տաթև Ֆռանգյան
