26.11.2024 | 09:46
Հրդեհ Գառնի գյուղում․ այրվել են ավտոտնակը, թոնրատունը և անասնագոմը՝ մասամբ
Ստամբուլում առաջիկա 7 տարում հզոր երկրաշարժի հավանակությունը 64 տոկոս է․ թուրք պրոֆեսորը նախազգուշացնում է
Քաղաքականություն
22.02.2023 | 16:47
Թուրքական Քանդիլիի աստղադիտարանի երկրաշարժերի և ցունամիների հետագծման տարածաշրջանային կենտրոնի տնօրեն, պրոֆեսոր Դողան Քալաֆաթը հայտարարել է, որ մինչև 2030 թվականը Ստամբուլում 7,0 մագնիտուդով երկրաշարժի հավանականությունը 64 տոկոս է, գրում է Duvar-ը։
Քալաֆաթի մեկնաբանությունները հնչում են այն ժամանակ, երբ Քահրամանմարաշի երկրաշարժերը նոր մտահոգություններ են առաջացրել Ստամբուլի կառույցների անվտանգության վերաբերյալ: Մինչ կառավարությունը խոստանում է արագ վերականգնել աղետից տուժած տարածաշրջանը, ուշադրությունը կենտրոնանում է նաև Ստամբուլի վրա, քանի որ փորձագետները տարիներ շարունակ զգուշացնում էին մոտ ապագայում մեգապոլիսում խոշոր երկրաշարժի հավանականության մասին։
Թուրք պրոֆեսորը նաև նախազգուշացրել է նոր երկրաշարժի մասին՝ «Հյուսիսային Անատոլիայի խզվածքի գծի միջին շրջանում»:
«Սակայն կենտրոնը լինելու է Մարմարա ծովը։ Սրա վտանգը հայտնի է։ Սա Մարմարա ծովով անցնող գիծն է։ Այս գիծը կստեղծի 7,0 մագնիտուդից բարձր երկրաշարժ: Սրա տեղը հայտնի է, բայց թե ե՞րբ, հնարավոր չէ ասել։ Այն ամենը, ինչ մենք կարող ենք, վիճակագրական վերլուծություն անելն է, որը ենթադրում է, որ երկրաշարժը տեղի է ունենալու 64 տոկոսով մինչև 2030 թվականը, 75 տոկոս՝ մինչև 2050-ը, 95 տոկոս՝ մինչև 2090 թվականը»,- ասել է թուրք պրոֆեսորը։
Կանխատեսվում է, որ այս երկրաշարժը մեծ ավերվածություններ է առաջացնելու Ստամբուլում։ Օրերս էլ քաղաքապետ Էքրեմ Իմամօղլուն զգուշացրել էր, որ քաղաքում 90,000 կառույց խոշոր երկրաշարժի հետևանքով ամբողջությամբ փլուզվելու վտանգի տակ է։
Էմմա Չոբանյան
