14.12.2024 | 19:57
Ինչ իրավիճակ է ճանապարհներին 19։35-ի դրությամբ
Թուրքիայում 25 մարդ է կալանավորվել երկրաշարժի մասին «սադրիչ» գրառումների համար
Քաղաքականություն
20.02.2023 | 23:04
Թուրքիայի Անվտանգության գլխավոր վարչությունը հայտարարել է, որ 25 մարդ է կալանավորվել երկրաշարժերի վերաբերյալ սոցիալական ցանցերում «սադրիչ» հրապարակումների համար, գրում է Gercek News-ը։
«Բացահայտվել են 808 օգտահաշիվներ, որոնցում երկրաշարժի կապակցությամբ «սադրիչ» գրառումներ են եղել։ Այս հաշիվներից 452-ի նկատմամբ հարուցվել է դատական վարույթ, 131 հոգի ձերբակալվել է, 25-ը՝ կալանավորվել»,- ասվում է հաղորդագրության մեջ։
Վարչությունը նշել է, որ 76 կայքեր փակվել են «ֆիշինգի խարդախությունների» համար, որոնք փորձել են գողանալ երկրաշարժից տուժածների համար նվիրատվությունները, նաև փակվել են սոցիալական կայքերի 15 հաշիվներ, որոնք ներկայացել են որպես պաշտոնական հաստատություններ:
Հավելենք, որ փետրվարի 8-ին՝ ավերիչ երկրաշարժերից երկու օր անց, Թուրքիան շուրջ 12 ժամով արգելափակել էր Twitter-ի հասանելիությունը՝ պատճառաբանելով ապատեղեկատվության տարածմամբ, ինչն առաջ բերեց ընդդիմադիր քաղաքական գործիչների և շարքային քաղաքացիների զայրույթը, որոնք այս հարթակն օգտագործում էին՝ հարազատներին գտնելու, ինչպես նաև փրկարարական աշխատանքների մասին տեղեկություններով կիսվելու համար։
Նախորդ տարի հոկտեմբերին էլ Թուրքիայի խորհրդարանն օրենք էր ընդունել, ըստ որի՝ լրագրողներն ու սոցիալական ցանցերի օգտատերերը կարող են մինչև երեք տարվա ազատազրկման դատապարտվել «ապատեղեկատվություն» տարածելու համար։ Այս օրենքը հարուցել էր իրավապաշտպանների և միջազգային տարբեր կառույցների մտահոգությունը։
Էմմա Չոբանյան
