Քաղաքականություն
17.02.2023 | 20:34
Եվրահանձնաժողովը սառեցրել է 21,5 միլիարդ եվրոյի ռուսական ակտիվները Եվրոպայում, աշխատում է արգելափակել մյուսները, այդ թվում՝ Ռուսաստանի Դաշնության Կենտրոնական բանկինը, և իրավական ուղիներ է փնտրում որոշ ակտիվների հնարավոր բռնագրավման համար։ Այս մասին ասել է Եվրահանձնաժողովի անդամ Դիդիե Ռեյնդերսը, որը վերահսկում է արդարադատության խնդիրները, գրում է Ինտերֆաքսը:
«Մեզ արդեն հաջողվել է սառեցնել 21,5 միլիարդ եվրոյի չափով ռուս օլիգարխների և իրավաբանական անձանց միջոցները, որոնք ներառված են պատժամիջոցների ցուցակներում: Մենք կշարունակենք աշխատել այլ ակտիվների ուղղությամբ, ինչպիսիք են Ռուսաստանի Կենտրոնական բանկի պահուստները»,- հայտարարել է նա Եվրահանձնաժողովի շրջանակում ստեղծված սառեցված ակտիվների գծով հատուկ աշխատանքային խմբի առաջին դեմ առ դեմ հանդիպմանը։
Ռեյնդերսը նաև հայտնել է, որ Բրյուսելն աշխատում է հրահանգի ուղղությամբ՝ ուժեղացնելու միջոցները նրանց դեմ, ովքեր փորձում են շրջանցել պատժամիջոցները։ Նա նշել է, որ այդ աշխատանքները փուլային են և չեն բացառում ակտիվների բռնագրավման գործընթացին անցում այն դեպքերում, երբ դրանք առնչվում են քրեական հանցագործություններին։
«Առաջին քայլն ակտիվների արգելափակումն է կամ սառեցումը, երկրորդ քայլը՝ բռնագրավման գործընթաց սկսելն այն դեպքերում, երբ կան քրեական հանցագործություններ»,- ասել է նա։
Ռեյնդերսն ընդգծել է, որ ԵՄ-ն աշխատում է այս ոլորտում G7-ի հետ միասին, և որ Շվեյցարիան գործում է մոտավորապես նույն կերպ։
Տաթև Ֆռանգյան
