20.03.2026 | 23:39
Կիևը Մերձավոր Արևելք ռազմական խմբեր է ուղարկել՝ ԱԹՍ-ներ որսալու համար
Ամո՛թ ձեզ․ Էրդողանը երկրաշարժի գոտում ընտրողների կատաղությանն է բախվում
Քաղաքականություն
10.02.2023 | 23:30
«Մի եկեք այստեղ ձայներ խնդրելու»,- Ադըյամանի բնակիչ Հաքան Թանրիվերդիի ուղերձն է Թուրքիայի նախագահ Ռեջեփ Թայիփ Էրդողանին երկրում վերջին տարիների ամենամեծ աղետից հետո։ Այս մասին գրում է AFP-ը, որին վկայակոչում է Turkish Minute-ը։
Երկրաշարժը, որին զոհ են գնացել հազարավոր մարդիկ Թուրքիայում և Սիրիայում, տեղի ունեցավ Էրդողանի երկու տասնամյակի կառավարման ամենազգայուն քաղաքական պահերից մեկում, երբ նա պատրաստվում էր ընտրություններին։ Նա առաջարկել է մայիսի 14-ին արտահերթ ընտրություններ անցկացնել։
Էրդողանը երկրաշարժից տուժած 10 նահանգներում երեք ամսով արտակարգ դրություն է հայտարարել։ Տարածաշրջանը դեռ որոնում է իր մահացածներին, շատերն ապրում են փողոցներում կամ իրենց մեքենաներում: Այստեղ նախընտրական քարոզչությունը բացառված է թվում:
Բայց կա նաև քաղաքական հարթություն, որը խորապես անձնական է Էրդողանի համար։ Երկրաշարժը տեղի ունեցավ հենց այն ժամանակ, երբ նա թափ էր հավաքում և սկսում էր բարձրացնել իր վարկանիշը, որը տուժել էր ահավոր տնտեսական ճգնաժամի ժամանակ։
Հրապարակման համաձայն՝ Թանրիվերդիի դառնությունը վատ նշան է Էրդողանի համար մի նահանգում, որտեղ նա 2018-ի վերջին ընտրություններում հաղթել էր իր աշխարհիկ ընդդիմադիր մրցակցին:
«Մենք խորապես վիրավորված էինք, որ ոչ ոք մեզ չաջակցեց»,- ասել է Թանրիվերդին երկրաշարժի ժամանակ կառավարության արձագանքի մասին:
Թանրիվերդիի դժգոհությունը սովորական է Ադըյաման նահանգում, որը երկրաշարժից ամենաշատ տուժածներից մեկն է: Տեղացիները բողոքում են, որ փրկարարները ժամանակին չեն ժամանել՝ դուրս բերելու առաջին կրիտիկական ժամերին ողջ մնացած մարդկանց։ Ոմանք մատնանշել են բետոնե սալերի միջով փորելու տեխնիկայի պակասը:
«Երկրաշարժի երկրորդ օրը ես ոչ ոքի չեմ տեսել մինչև ժամը 14:00-ն։ Ո՛չ կառավարություն, ո՛չ պետություն, ո՛չ ոստիկանություն, ո՛չ զինվոր։ Ամո՛թ ձեզ։ Դուք մեզ միայնակ թողեցիք»,- ասել է Ադըյամանի մեկ այլ բնակիչ Մեհմեդ Յըլդըրըմը։
Սա վշտացրել է նաև կամավոր Հեդիյե Քալքանին, որը 150 կմ է անցել՝ Ադըյամանում փրկարարական և վերականգնման ջանքերին մասնակցելու համար։
«Ինչո՞ւ պետությունը ցույց չի տալիս իրեն այսօր։ Մարդիկ հարազատների մարմինները դուրս են բերում սեփական միջոցներով»,- ասել է նա։
Հավելենք, որ Ադըյամանում է աշխատում նաև Հայաստանից մեկնած փրկարարական խումբը։
Էմմա Չոբանյան
