08.11.2026 | 17:07
Ադրբեջանի պաշտպանության նախարարը կորոնավիրուսով է վարակվել
Դատախազն առաջարկում է 1 տարով ազատազրկել կնոջը հետապնդող տղամարդուն
Հասարակություն
06.02.2023 | 19:30
Այսօր Երևան քաղաքի ընդհանուր իրավասության դատարանի Կենտրոն նստավայրում կայացավ հետապնդման գործով հերթական դատական նիստը, որի ընթացքում դատախազն ընթերցեց մեղադրական ճառը։ Նա առաջարկեց մեղադրյալ Վ․Հ․-ին մեղավոր ճանաչել տուժող Ն․Դ․-ին հոգեկան ուժեղ տառապանք պատճառելու համար (ՀՀ քրեական օրենսգրքի 119-րդ հոդված) և դատապարտել 1 տարի ժամկետով ազատազրկման։
Հիշեցնենք, որ տուժողի ցուցմունքի համաձայն՝ 48-ամյա տղամարդը 2014 թվականին փողոցում պատահաբար հանդիպել է իրեն և սկսել հետապնդել։ Վ․Հ․-ն, ըստ տուժողի, 8 տարի շարունակ հետապնդել է իրեն։ Տղամարդը պարբերաբար մոտեցել է կնոջը, ասել, թե սիրում է նրան և փորձել է բռնի համբուրել։
«Ես մտածում էի, որ իմ ապրելն էլ իմաստ չունի, չէի կարողանում տնից դուրս գալ, ուր գնում էի, ինքը հայտնվում էր ու հարամ անում։ Ես մղձավանջի մեջ եմ ապրել 8 տարի»,- դատարանում պատմել է տուժողը։
Այսօրվա դատական նիստից հետո Ն․Դ․-ն Factor.am-ի հետ զրույցում նշեց, որ հետապնդումները շարունակվում են մինչ օրս․ «Ինքը պարբերաբար հայտնվում է այն վայրերում, որտեղ ես եմ լինում, իբրև թե՝ պատահաբար։ Երբ հեռախոսս հանում եմ, որ նկարեմ, արագ հեռանում է»։
Տուժողը նաև ասաց, որ ինքը սարսափելի հոգնել է թե՛ հետապնդումներից, թե՛ ձգձգվող դատական նիստերից։
Հիշեցնենք, որ դատարանում ցուցմունք է տվել նաև մեղադրյալը՝ նշելով, որ ինքը ցանկացել է ամուսնանալ տուժողի հետ, գնացել է նրանց տուն՝ ամուսնության առաջարկություն անելու, սակայն մերժվել է, իսկ հետագայում մոտեցել է կնոջը փողոցում, որպեսզի հասկանա, թե նա իրեն ինչու է վիրավորում։
Հաջորդ դատական նիստին ճառերով հանդես կգան դատավարության կողմերը։ Նիստը կկայանա մարտի 23-ին՝ ժամը 10։00-ին։
Արման Ղարիբյան
Նկարազարդումը՝ Ելենա Ակոջյանի
