Կողոպուտ կատարելու, ինչպես նաև փաստաթղթեր, դրոշմներ, կնիքներ կամ տրանսպորտային միջոցների պետհամարանիշներ հափշտակելու, շորթելու, ոչնչացնելու, վնասելու կամ թաքցնելու կասկածանքով երեկ ձերբակալվել է գյումրեցի չորս տղամարդ։ Նրանցից մեկը, Factor.am-ի տեղեկություններով, Գյումրու ավագանու ՔՊ խմբակցության անդամ Աղասի Մաթևոսյանն է՝ ՀՀ նախկին փոխվարչապետ Համբարձում Մաթևոսյանի ազգականը։ Աղասի Մաթևոսյանը նաև Ախուրյանի թիվ 1 դպրոցի հոգաբարձուների խորհրդի անդամ է։
ՀՀ Քննչական կոմիտեից մեզ պարզաբանել են, որ նախաձեռնվել է քրեական վարույթ՝ Քրեական օրենսգրքի 253-րդ հոդվածի 2-րդ մասի 1-ին կետով և 456-րդ հոդվածի 2-րդ մասի 1-ին կետով, և որ 4 անձինք ձերբակալվել են այդ գործի շրջանակում, հանցանքի կատարման մեջ անմիջականորեն ծագած կասկածի հիման վրա։ ՀՀ ոստիկանությունը ևս իր պաշտոնական էջում այսօր տեղեկություններ է հաղորդել 4 անձանց մասնակցությամբ տեղի ունեցած միջադեպի մասին։
«Փետրվարի 3-ին՝ ժամը 06.45-ին, ոստիկանության Ախուրյանի բաժնում հաղորդում տված քաղաքացին հայտնել էր, որ ժամը 03.00-ի սահմաններում ընկերուհու հետ եղել են Գյումրի քաղաքի ռեստորանային համալիրներից մեկի մոտակայքում, երբ իրենց է մոտեցել «Նիվա» մակնիշի մի մեքենա, ապա մեքենայից իջած երեք անձինք սկսել են խուզարկել իրենց, իր մոտից վերցրել են դրամապանակը և հեռախոսը, իսկ ընկերուհու մոտից՝ նրա և իր ՌԴ քաղաքացու անձնագրերը և հեռախոսը, վիճաբանել են իրենց հետ, ինչից հետո նրանցից մեկը իր դրամապանակից վերցնելով 910 եվրո՝ հեռացել են:
Քաղաքացին նաև հայտնել էր, որ այդ ժամանակ նկատելով պարեկային ծառայության մեքենան՝ մոտեցել են և պարեկներին հայտնել կատարվածի մասին:
Պարեկային ծառայողները և Ախուրյանի բաժնի ծառայողները համատեղ միջոցառումների արդյունքում Գյումրի քաղաքի Թեհլերյան փողոցում հայտնաբերել, ձերբակալել և Ախուրյանի բաժին են տարել չորս տղամարդու՝ «Նիվայով» հանդերձ: Բաժնում կատարված անձնական խուզարկությամբ նրանցից մեկի մոտ հայտնաբերվել է 710 եվրո և 17 000 դրամ, մյուսի մոտ՝ 200 եվրո: Գյումրեցի չորս տղամարդիկ, կազմված փաստաթղթերը և հայտնաբերվածը ներկայացվել են Ախուրյանի քննչական բաժին»,- գրված է ոստիկանության պաշտոնական լրահոսում։
Արմիկ Մովսիսյան
