Ֆրանսիան մտահոգված է Լաչինի միջանցքի շրջափակմամբ և կոչ է անում ապաշրջափակել այն՝ Լեռնային Ղարաբաղում հումանիտար ճգնաժամ թույլ չտալու համար։ ТАСС-ի հաղորդմամբ՝ այս մասին հայտարարել է Ֆրանսիայի ԱԳՆ մամուլի քարտուղար Անն Կլեր Լեժանդրը RTVI-ին տված հարցազրույցում։
«Այսօր մենք չափազանց մտահոգված ենք Լաչինի միջանցքի շրջափակմամբ և մշտապես պահանջում ենք, որ այն ապաշրջափակվի բնակչությանը պարենային և հումանիտար օգնություն հասցնելու համար»,- ասել է Լեժանդրը:
Նրա խոսքերով ՝ «Լեռնային Ղարաբաղում լուրջ հումանիտար ճգնաժամի առաջացման իրական վտանգ կա»։ Ֆրանսիայի ԱԳՆ մամուլի քարտուղարը նաև հայտարարել է, որ Փարիզը «կողմ է Հայաստանի և Ադրբեջանի միջև բանակցությունների վերսկսմանը»:
«Գոյություն ունի եվրոպական միջնորդություն, որին մենք, անշուշտ, աջակցում ենք։ Հենց Ֆրանսիայի նախագահ Էմանուել Մակրոնի շնորհիվ է, որ երկու երկրների ներկայացուցիչները կարողացել են միմյանց հետ խոսել անցած տարվա հոկտեմբերին Պրահայի գագաթնաժողովի շրջանակներում։ Այդ շրջանակներում որոշվել է Եվրամիության առաքելությունը Հայաստանի կողմից ուղարկել սահման՝ լարվածությունը նվազեցնելու և նրա սահմանների պահպանումն ապահովելու նպատակով»,- հիշեցրել է նա:
Հիշեցնենք՝ Ադրբեջանի կառավարության գործակալները ահաբեկչական գործողություններով 55 օր շարունակ շրջափակման պայմաններում պատանդ են պահում Արցախի 120,000 բնակչությանը:
Շրջափակման պատճառով Արցախի 120,000 բնակչությունը (ներառյալ՝ շուրջ 30,000 երեխա, 20,000 տարեց, 9,000 հաշմանդամություն ունեցող անձ) կրում է բազմաթիվ զրկանքներ և, ի թիվս այլ իրավունքների խախտման, կանգնած է թերսնման և ցրտահարման մեծ ռիսկի առջև:
Շրջափակման պայմաններում սննդի սրացող սղության պատճառով հունվարի 9-ից փակվել է 41 մանկապարտեզ, 20 երկարօրյա ուսումնական հաստատություն։
5,528 երեխա այլևս չի կարողանում մանկապարտեզ հաճախել՝ զրկվելով համապատասխան խնամք և սնունդ ստանալու հնարավորությունից:
Շրջափակման մեկնարկից ի վեր աշխարհի բազմաթիվ երկրներ ու միջազգային կազմակերպություններ դատապարտել են Ադրբեջանի գործողությունները և կոչ արել վերացնել շրջափակումը: Հարցը քննարկվել է նաև ՄԱԿ-ի Անվտանգության խորհրդում, Մարդու իրավունքների եվրոպական դատարանը պարտավորեցրել է Ադրբեջանին ձեռնարկել բոլոր անհրաժեշտ և բավարար միջոցները վերացնելու շրջափակումը, հարցը քննարկվել է նաև ՄԱԿ-ի Արդարադատության միջազգային դատարանում (Հաագա)՝ Ռասայական խտրականության վերացման կոմիտեի վարույթի շրջանակներում։ Եվրոպական խորհրդարանում Արցախի շրջափակման հումանիտար հետևանքների մասին բանաձև է ընդունվել։
