Բորելը չի բացառել Կիևին կործանիչների մատակարարումը

ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը չի ​​բացառել Ուկրաինա կործանիչների  մատակարարման հնարավորությունը՝ չնայած արևմտյան մի շարք երկրների, այդ թվում՝ Գերմանիայի և ԱՄՆ-ի, ներկայիս դիրքորոշմանը, գրում է DW-ի ռուսական ծառայությունը։ Բորելը նման հայտարարություն է արել ԵՄ-Ուկրաինա գագաթնաժողովի նախօրեին։ Նա նշել է, որ մարտական տանկերի մատակարարումը ևս սկզբում վիճելի հարց էր, սակայն արդյունքում հաջողվել է հասնել կոնսենսուսի՝ այդ «կարմիր գիծն անցնելով»։

Միաժամանակ Բորելը հիշեցրել է, որ Ռուսաստանի և Ուկրաինայի միջև հակամարտության հնարավոր սրման մտավախություններն արտահայտվել են նախկինում Կիևին արևմտյան զենքի մատակարարման յուրաքանչյուր նոր փուլից առաջ։ Հարցին, թե ինքը հավանություն տալի՞ս է արդյոք կործանիչների հնարավոր մատակարարումներին, դիվանագետը չի պատասխանել։

«Իմ առաջադրանքը կայանում է նրանում, որ հասնենք կոնսենսուսի»,-ասել է Բորելը։ Միաժամանակ նա պարզաբանել է, որ նման իրավիճակում չարժե բացահայտ այս կամ այն դիրքորոշումն արտահայտել, դրան չխանգարելու համար։

Մի շարք եվրոպացի քաղաքական գործիչներ, այդ թվում՝ Լեհաստանի վարչապետ Մատեուշ Մորավեցկին բացահայտ արտահայտվել են ինքնաթիռների մատակարաման օգտին։ Իսկ ահա Գերմանիայի կանցլեր Օլաֆ Շոլցը և ԱՄՆ նախագահ Ջո Բայդենն ավելի զգուշավոր դիրքորոշում են ցուցաբերում և չեն շտապում պաշտպանել նման մատակարարումների գաղափարը։

Էմմա Չոբանյան