ԵԽԽՎ-ում քննարկել են Ադրբեջանում քաղբանտարկյալների և մարդու իրավունքների վատթարացման խնդիրը

Ստրասբուրգում ԵԽԽՎ ձմեռային նստաշրջանի շրջանակում տեղի է ունեցել «Ադրբեջանում քաղբանտարկյալների հարցի շարունակությունը. Շտրասերի զեկույցի մերժումից 10 տարի անց» խորագրով միջոցառումը, հայտնում է VOA-ի ադրբեջանական ծառայությունը։

Նշվում է, որ 2013 թվականի հունվարին քննարկվել է ԵԽԽՎ նախկին զեկուցող Քրիստոֆ Շտրասերի՝ Ադրբեջանում քաղբանտարկյալների վերաբերյալ զեկույցի մերժումը, այս խնդրի առնչությամբ ի հայտ եկած կոռուպցիոն փաստերը, ԵԽԽՎ Ադրբեջանի բազմաթիվ պատգամավորների կաշառակերությունն ու թանկարժեք նվերները։

Նախօրեին միջոցառմանը մասնակցած նախկին զեկուցող Քրիստոֆ Շտրասերը կիսվել է միջոցառման մասին իր հիշողություններով և փորձառությամբ։

«Մենք բոլորս պետք է աշխատենք բացահայտելու և կանխելու նման միջադեպերը, բաց կոռուպցիան: Սա սպառնալիք է ժողովրդավարության զարգացման համար: Այդ իսկ պատճառով նման միջոցառումները կարևոր են: Ի՞նչ կարող ենք սովորել անցյալի իրադարձություններից, ի՞նչ կարող ենք փոխել. կոռուպցիայի նման դեպքերը չպետք է կրկնվեն»,- ասել է նա։

2019 թվականին ԵԽԽՎ-ն վերադարձել է Ադրբեջանում քաղբանտարկյալների խնդրին և 2020 թվականին համապատասխան բանաձև ընդունել։ Չնայած դրան, բանախոսները մտահոգություն են հայտնել, որ Ադրբեջանում դեռևս կան քաղաքական դրդապատճառներով ձերբակալություններ, մարդու իրավունքների խախտումներ։ ԵԽԽՎ գերմանացի պատգամավոր Ֆրանկ Շվաբեն ասել է, որ մարդու իրավունքները, օրենքի գերակայությունը և ժողովրդավարությունն այս կազմակերպության հիմքն են, և քաղբանտարկյալներ ունեցող երկիրը չպետք է տեղ ունենա այս կառույցում։

«Սա միանգամայն պարզ է, և մենք պետք է բացահայտ խոսենք դրա մասին։ Մենք տեսնում ենք, որ Թուրքիայում կան քաղբանտարկյալներ, կան քաղբանտարկյալներ Ռուսաստանում, բայց Ռուսաստանն այլևս այս կազմակերպության անդամ չէ։ Ադրբեջանում էլ կան քաղբանտարկյալներ, միշտ այս ցուցակում է: Մեզ մտահոգում է դա: Մենք պատրաստում ենք բազմաթիվ զեկույցներ և առաջարկություններ, բայց իրականությունն այն է, որ դա շատ չի օգնում: Բայց ի՞նչ ենք մենք արել: Մենք կարողացանք փոխել մթնոլորտը հենց կազմակերպությունում, վերաբերմունքն այս հարցին, քանի որ Ադրբեջանը նախկինում կաշառում էր այլ երկրների պատգամավորներին, վերջին տարիներին մենք դա արել ենք, մենք կարողացանք փոխել, հիմա մեր զեկույցները հստակ ցույց են տալիս, որ իրավիճակը երկրում, ցավոք, շատ վատ է»,- ասել է նա։

«Խավիարային դիվանագիտություն» հետազոտության հեղինակ, European Stability Initiative վերլուծական կենտրոնի ղեկավար Ջերալդ Կնաուսն էլ նշել է, որ քաղբանտարկյալների հարցը քննարկվում է Ադրբեջանի ԵԽ անդամ դառնալու առաջին օրվանից, և ճնշումը պետք է ավելացվել՝ խնդիրը լուծելու համար։

Էմմա Չոբանյան