08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Հրդեհի գործով սպա է ձերբակալվել․ նրան սպառնում է 5-15 տարվա ազատազրկում
Հասարակություն
26.01.2023 | 12:03
Զինվորական կացարանում բռնկված հրդեհի հետևանքով նախաձեռնված քրեական վարույթի շրջանակներում ՀՀ ՊՆ N զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գ.Ա.-ն ձերբակալված է։
Այս մասին Factor.am-ի հարցին ի պատասխան ասաց ՀՀ քննչական կոմիտեի մամուլի քարտուղար Գոռ Աբրահամյանը։
Հիշեցնենք, որ այսօր առավոտյան Գլխավոր դատախազությունը հաղորդագրություն է տարածել այն մասին, որ մինչդատական քրեական վարույթի օրինականության նկատմամբ հսկողություն իրականացնող դատախազի կողմից հունվարի 25-ին որոշում է կայացվել ՀՀ ՊՆ N զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գ.Ա.-ի նկատմամբ հարուցել հանրային քրեական հետապնդում՝ ՀՀ քրեական օրենսգրքի 550-րդ հոդվածի 3-րդ մասով (զինվորական պաշտոնեական անփութություն, որն անզգուշությամբ առաջացրել է մարդու մահ)։
Այս հոդվածով սահմանվում է 5-ից մինչև 15 տարի ժամկետով ազատարզկում։
Աբրահամյանից հետաքրքրվեցինք՝ արդյոք այս պահին արդեն մեղադրանք առաջադրվե՞լ է Գ․Ս․-ին, ինչին ի պատասխան նա նշեց, որ իրականացվում են դատախազի կողմից հանրային քրեական հետապնդում հարուցելու որոշումից բխող գործողություններ։
Հրդեհի դեպքից հետո շրջանառվում են տեղեկություններ, որ կացարանում գտնվող զինվորները կոնֆլիկտ են ունեցել կապիտանի հետ։ Աբրահամյանի խոսքով՝ քննության շրջանակներում այդպիսի բոլոր տվյալները դառնում են քննության առարկա։
«Բոլոր հարցերը քննության շրջանակներում կստանան իրենց պատասխաները, այս պահին դեռևս խիստ ժամանակավրեպ ենք համարում քրեական գործի հանգամանքների վերաբերյալ տեղեկություններ հայտնելը»,- ասաց Գոռ Աբրահամյանը։
Արաքս Մամուլյան
