Սեյրան Օհանյանն առքուվաճառքի գործարք է կատարել կնոջ բարեկամի և օգնականի անուններով. դատախազ․ ՏԵՍԱՆՅՈՒԹ

Հակակոռուպցիոն դատարանում ընթանում է պաշտպանության նախկին նախարար, «Հայաստան» խմբակցության ղեկավար Սեյրան Օհանյանից, ըստ դատախազի ապօրինի ծագման գույքի բռնագանձման վերաբերյալ նիստը։

Հայցի պահանջն է՝ Սեյրան Օհանյանից և նրա կնոջից՝ Ռուզաննա Խաչատրյանից բռնագանձել «Լեքսուս» ավտոմեքենա, Նալբանդյան 98 հասցեի մի քանի անշարժ գույք, Վահագնի թաղամասում գտնվող անշարժ գույքը, ինչպես նաև 477,4 մլն դրամ և 600,7 մլն դրամ։

Ըստ հայցի, որը ներկայացրեց դատախազը, 2009 թվականին Սեյրան Օհանյանի ներկայացրած հայտարարագրում հայտարարագրվել է Ռուզաննա Խաչատրյանին նվիրատվություն 3 ,7 մլն դրամ, իսկ վերջինիս կողմից հայտարարագրվել է նշված գումարով «Լեքսուս»-ի ձեռքբերում, ինչը չի համապատասխանում ՃՈ տվյալներին՝ «Լեքսուս»-ը Ռուզաննա Խաչատրյանի անունով հաշվառվել է 2011 թվականի հոկտեմբերի 3-ին: Նույն տարում, ինչպես նշեց դատախազը, այդ ավտոմեքենայի համար Խաչատրյանի վճարումը չի գտնվել բանկային քաղվածքներում։

Դատախազի ներկայացմամբ՝ մի քանի հարյուր միլիոն դրամի գործարքներ են կատարվել Սեյրան Օհանյանի օգնականի՝ Արթուր Առաքելյանի անվամբ, ինչը դատախազի կարծիքով, կապված է Օհանյանի հետ, այսինքն, այդ գործարքների հետևում կանգնած է հենց Սեյրան Օհանյանը։

Սեյրան Օհանյանը առարկեց, ասելով՝ փաստերը չեմ ընդունում, ապօրինի չեմ հարստացել, և նշված գույքերն ինձ չեն պատկանում։

Նիստը հետաձգվեց, հաջորդ դատական նիստի օր նշանակվեց մարտի 9-ը։

Մանրամասները՝ տեսանյութում։