Հաղորդաշարեր
31.12.2022 | 19:02«Փոքրոգությունը մեր հանրությանն իրոք շատ է խանգարել, դարեր շարունակ է այդպես եղել: Այդ է պատճառը, որ cover տարբերակով անդրադարձանք Ռափայել Պատկանյանի խոսքերի հիման վրա գրված երգին. «Երնեկ թե այս Նոր տարին վերջ տար հայի ցավերուն…»: Հուսամ` կգա մի ժամանակ, երբ այս երգն այլևս արդիական չի լինի»,- Factor TV-ի հետ զրույցում նշում է «Նեմրա» ռոք խմբի կիթառահար և վոկալիստ Վան Եղիազարյանը:
Նա ամփոփում է 2022 թվականը և նկատում, որ տարին «Նեմրա»-ի համար բավական բարենպաստ է եղել` ԱՄՆ-ում` Բոստոնում, ունեցել են մեծ համերգ, ծանոթացել են «Քուին» խմբի կիթառահար Բրայան Մեյի հետ, վերջապես հանդիպել են աշխարհահռչակ ռոք երաժիշտ Սերժ Թանկյանին, նկարահանել են իրենց խմբի պատմության մեջ ամենամեծ թվով տեսահոլովակները:
Վանը խոսում է նաև հայաստանյան փոքր շուկայի, պրոդյուսերական դպրոցի` զարգացած չլինելու և արտերկրի առաջարկների մասին։
«Թեպետ երբեք չենք հրաժարվում դրսում ելույթ ունենալ, այնուամենայնիվ, մեր արմատներն այստեղ են, խմբի թռիչքն այստեղից է սկսվել, և մենք ուզում ենք մնալ Հայաստանում, մեզ այստեղ է հարմար: Ամեն դեպքում, շատ երազկոտ պետք է լինես, որ Հայաստանում ռոքով զբաղվես: Մենք այդ եզակի երազկոտներից ենք, չնայած եղել են փուլեր, երբ կարող էինք հիասթափվել»,- նշում է երաժիշտը։
Մեր զրուցակիցը շեշտում է` իրենց համար ամենակարևորն այն է, որ հանդիսատեսը գնահատի հեղինակային երգերը. «Դրանք արտիստի միտքն ու հոգին են, պետք է աջակցել այն արտիստներին, որոնք զրոյից նոր երգ են ստեղծում»:
Մանրամասները` տեսանյութում:
Աննա Բաբաջանյան
