Ադրբեջանի պահանջները գնալով ընդլայնվեցին․ ցանկանում են օր առաջ ազատվել ռուսական զորքերից․ թուրքագետ․ ՏԵՍԱՆՅՈՒԹ

«Ադրբեջանական կողմի վերջնական նպատակն այն է, որ հայկական կողմը վերջնականապես ճանաչի Ղարաբաղը՝ Ադրբեջանի կազմում և ռուսական զորքերն այնտեղից օր առաջ հեռանան»,- «Ադրբեջանական և թուրքական մամուլը՝ Լաչինի միջանցքում ստեղծված իրավիճակի մասին» թեմայով քննարկման ժամանակ այս մասին նշեց թուրքագետ Մուշեղ Խուդավերդյանը։

Նրա խոսքով՝ ադրբեջանական մամուլում հիմնականում շրջանառվում է այն միտքը, որ Լաչինի միջանցքի փակման և ԼՂ շրջափակման պատճառն այնտեղ օգտակար հանածոների ապօրինի կիրառումը բացառելն է․ «Այսինքն՝ ադրբեջանական կողմը կոնկրետ նշում է, որ պետք է վերահսկողություն սահմանվի Ղարաբաղի այն հանքավայրերի նկատմամբ, որոնք համարում է կարևոր։ Դրանցից մեկը Դրմբոնի հանքավայրն է, մյուսը՝ երկաթի հանքավայրերն են, որոնք Ադրբեջանն անվանում է Դեմիրլի։ Ադրբեջանը ցանկանում է, որ այդ հանքավայրերի շահագործման վերահսկողությունը լինի իր ձեռքում»։

Թուրքագետը հավելեց, որ բացի դրանից՝ Ադրբեջանը ցանկանում է նաև սկաներներ տեղադրել և ամենօրյա մոնիթորինգ իրականացնել Լաչինի միջանցքով անցնող և դեպի Արցախ գնացող-եկող մեքենաների և ուղևորների նկատմամբ։

«Ադրբեջանի պահանջները գնալով ընդլայնվեցին․․․ Խոսքը վերաբերում է անկլավներին, Զանգեզուրի միջանցքին, և այս շրջափակման շարունակման պարագայում, կարծում եմ, այդ պահանջները ևս կդրվեն, քանի որ ադրբեջանական մամուլը բացահայտ խոսում է այդ մասին»,- ընդգծեց Խուդավերդյանը։

Մանրամասները՝ տեսանյութում։