27.06.2026 | 18:27
Կոշտ քաղաքական խոսույթը ատելության խոսք չէ ու չի կարող արդյունքներն անվավեր ճանաչելու հիմք լինել. Սրբուհի Գալյան․ ՏԵՍԱՆՅՈւԹ
«Ղարաբաղում ռուս խաղաղապահները ՄԱԿ-ի, ԵԱՀԿ-ի կամ ինչ-որ Մինսկի խմբով առաքելությամբ փոխարինելու գաղափարը հարցեր է առաջացնում»․ Լավրով
Քաղաքականություն
23.12.2022 | 18:45
Լեռնային Ղարաբաղում ռուսական խաղաղապահ զորակազմը ՄԱԿ-ի, ԵԱՀԿ-ի կամ ԵԱՀԿ Մինսկի խմբի առաքելություններով փոխարինելու գաղափարն առնվազն մի քանի հարց է առաջացնում։ Այս մասին հայտարարել է ՌԴ ԱԳ նախարար Սերգեյ Լավրովը Ադրբեջանի ԱԳ նախարար Ջեյհուն Բայրամովի հետ բանակցություններից հետո կայացած մամուլի ասուլիսում։
«Եթե ինչ-որ մեկը կարծում է, որ ՄԱԿ-ի, ԵԱՀԿ-ի, ինչ-որ Մինսկի խմբի փաստահավաք խումբը պետք է փոխարինի ռուսական խաղաղապահ զորակազմին, ապա առնվազն մի երկու հարց է առաջանում: Առաջին հարցն այն է, որ դա անելու համար անհրաժեշտ է կողմերի համաձայնությունը, առաջին հերթին՝ Ադրբեջանի և Հայաստանի։ Եթե կա այդպիսի հետաքրքրություն, և եթե դա լուրջ հետաքրքրություն է, ապա, հավանաբար, դա նախ պետք է առաջարկել նրանց, ովքեր որոշում են կայացրել ուղարկել ռուսական խաղաղապահ զորակազմ և կողմ են արտահայտվել բանակցությունների սեղանի շուրջ նստել ու մտածել այլ տարբերակի օգտին»,- ասել է նա։
«Եթե սա արվում է խոսափողի միջոցով, հրապարակային, ապա այդպես էլ պետք է վերաբերվել, որ սա հանրային գնահատականի, հանրային դիրքորոշման ներկայացման մաս է»,- շեշտել է ՌԴ արտգործնախարարը։
Լավրովը հերթական անգամ շեշտել է, որ ռուս խաղաղապահները հստակ են կատարում իրենց խնդիրները, որոնք սահմանված են 2020 թվականի նոյեմբերի 9-ի համաձայնագրով։
«Հիշեցնեմ, որ տեղում իրավիճակը պարզ չէ, մեր զինվորականների համար քիչ բարդություններ չեն ստեղծվում, այդ թվում՝ խախտելով այն ռեժիմը, որը հաստատվել է եռակողմ պայմանավորվածություններով, խախտելով այն պարտավորությունները, որոնք ելնում են այդ պայմանավորվածություններից։ Բացի այդ, մեր զինվորականները չհիմնավորված մեղադրանքների են ենթարկվում»,- ասել է Լավրովը։
Հիշեցնենք՝ Մոսկվայում այսօր նախատեսված Միրզոյան-Լավրով-Բայրամով հանդիպմանը ՀՀ ԱԳ նախարար Արարատ Միրզոյանը չի մասնակցել։ ՀՀ ԱԳՆ-ից հիմնավորել են՝ այս պահին Հայաստանի արտաքին գործերի նախարարի առաջնահերթությունն արդեն 11 օր փակ պահվող Լաչինի միջանցքի անխոչընդոտ վերագործարկման և Լեռնային Ղարաբաղում հումանիտար ճգնաժամի արդյունքում ստեղծված խնդիրների հասցեագրումն է:
Տաթև Ֆռանգյան
