27.02.2026 | 12:00
Աննա Հակոբյանը հեռանում է կառավարական առանձնատնից // Զինվորի մահվան դեպքով ձերբակալված կա. ԼՈՒՐԵՐ
Ալիևն ու Վուչիչը Ադրբեջանի և Սերբիայի միջև ռազմավարական գործընկերության փաստաթուղթ են ստորագրել
Քաղաքականություն
23.11.2022 | 22:15
Ադրբեջանի նախագահ Իլհամ Ալիևն այսօր պաշտոնական այցով Բեգրադում է։ Սերբիայի նախագահ Ալեքսանդր Վուչիչի հետ հանդիպումից հետո տեղի է ունեցել փաստաթղթերի ստորագրման արարողություն՝ ընդլայնված կազմով, գրում են ադրբեջանական լրատվամիջոցները։
Նշվում է, որ Ալիևն ու Վուչիչը ստորագրել են փաստաթղթեր, այդ թվում՝ «Ադրբեջանի Հանրապետության և Սերբիայի Հանրապետության միջև ռազմավարական գործընկերության խորհրդի ստեղծման մասին» հուշագիր և դրան կից «Ադրբեջանի Հանրապետության և Սերբիայի Հանրապետության միջև ռազմավարական գործընկերության խորհրդի կանոնակարգի» հավելվածը։
Վուչիչի հետ համատեղ ճեպազրույցում Ալիևը հայտարարել է, որ երկու երկրները ռազմավարական գործընկերներ են։
«Մենք բառացիորեն ռազմավարական գործընկերներ ենք, քանի որ հաջողությամբ համագործակցում ենք բազմաթիվ ոլորտներում, և մեր համագործակցությունն ունի ռազմավարական նպատակներ։ Սերբիան և Ադրբեջանը միշտ աջակցում են միմյանց միջազգային ասպարեզում, երկրները փոխադարձաբար ճանաչում են միմյանց ինքնիշխանությունն ու տարածքային ամբողջականությունը։ Այդ դիրքորոշումը միանշանակ է և կմնա անփոփոխ։ Այսօր մեր միջև ստորագրված փաստաթղթերը հանդիսանում են երկկողմ հարաբերությունների իրավական հիմքը։ Այդ փաստաթղթերի մեջ առանձնահատուկ տեղ է գրավում ռազմավարական գործընկերության փաստաթուղթը»,- ասել է Ադրբեջանի նախագահը։
Ի դեպ, օրերս Ալիևն այցով Ալբանիայում էր, որի նախագահը Ադրբեջանի ղեկավարին հորդորել էր ճանաչել Կոսովոյի անկախությունը։
Էմմա Չոբանյան
