Դատավորի անունը լսելիս հասկանում ենք՝ արդարադատությունը որակյա՞լ է լինելու, թե՞ ոչ. Արսեն Սարդարյան․ ՏԵՍԱՆՅՈՒԹ

Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանի նախաձեռնությամբ աշխատանքային քննարկում է կազմակերպել «ՀՀ դատարանների գերծանրաբեռնվածության խնդիրները եվ դատական գործը ողջամիտ ժամկետում քննելը՝ որպես «Մարդու իրավունքների եվ հիմնարար ազատությունների պաշտպանության մասին» եվրոպական կոնվենցիայի 6-րդ հոդվածով սահմանված՝ անձի արդար դատաքննության իրավունքի տարր» թեմայով։

Փաստաբան Արսեն Սարդարյանի դիտարկմամբ՝ առանձին բռնագանձման դատարան ստեղծելով՝ հնարավոր կլինի թեթևացնել դատավորների ծանրաբեռնվածությունը․ «Փոքր բյուջեով հնարավոր է հասնել հսկայական արդյունքի»։

Դատարանների ծանրաբեռնվածության հարցը, ըստ փաստաբանի, խիստ օրհասական է նաև տնտեսական առումով․ «Երբ մեր երկրում ներդրում անողները հարցնում են արդարադատության պրոցեսի որակի մասին, ես կմկմում եմ, որովհետև դատական վեճի լուծումը մեկ-երկու տարի է ձգվում, իսկ դա կարող է տնտեսվարողին մեծ գումարների կորստի կամ սնանկացման բերել։ Եվ շղթայական օղակով կարող են սնանկանալ նաև տարբեր այլ կազմակերպություններ․ այսինքն՝ դատական գործերի ձգձգումը տնտեսական որոշակի վտանգներ է ստեղծում․ դատարանները կարևոր անելիք ունեն, պետք է արագ արձագանքեն, արագ լուծում տան»։

Սարդարյանն անդրադարձավ նաև դատավորների հեղինակությանը․ «Երբ որ գործը մակագրվում է , դատավորի անունը լսելիս հասկանում ենք՝ արդարադատությունը որակյա՞լ է լինելու, թե՞ ոչ․․․ Անբարեխիղճ դատավորը պետք է գործի քննության ընթացում առերևույթ խախտումների դեպքում կարգապահական պատասխանատվության ռիսկի առջև կանգնի»։

Մանրամասները տեսանյութում։