Քաղաքականություն
01.11.2022 | 22:47
Նախիջևանի Ինքնավար Հանրապետության պետական անվտանգության ծառայությունը լուծարվել է։ Այս մասին հայտնում են ադրբեջանական լրատվամիջոցները։
Նշվում է, որ դրա հիմքի վրա ստեղծվել է Ադրբեջանի պետական անվտանգության ծառայության Նախիջևանի գլխավոր վարչությունը, որի ղեկավար է նշանակվել գնդապետ Մոհսուն Աշուրովը։ Վերջինն աշխատել է Բաքվի օդանավակայանի պետական անվտանգության ծառայությունում։
Նախիջևանի պետական անվտանգության ծառայությունը վերացնելու և Ադրբեջանի կենտրոնական իշխանություններին ենթարկեցնելու այս քայլը բավական ուշագրավ է։ Չի բացառվում, որ ապագայում Ադրբեջանի նախագահ Իլհամ Ալիևն աստիճանաբար Նախիջևանի կառույցները կզրկի ինքավար կարգավիճակից։
Ի դեպ, ադրբեջանցի ընդդիմադիր լրագրող Հաբիբ Մյութեզիրը սոցցանցերի իր էջերում գրել է, որ իր տեղեկություններով՝ Նախիջևանի բոլոր գերատեսչությունները սկսելու են ենթարկեցնել Բաքվի կենտրոնական գերատեսչություններին։
Էմմա Չոբանյան
