Արևմուտքը Թուրքիային ստիպում է միանալ հակառուսական պատժամիջոցներին․Անկարայում ՌԴ դեսպան

Արևմուտքը, օգտագործելով ցանկացած միջոց, այդ թվում կոշտ շանտաժը, փորձում է Թուրքիային ստիպել միանալ Ռուսաստանի դեմ պատժամիջոցներին։ Այս մասին հայտարարել է Անկարայում ՌԴ արտակարգ ու լիազոր դեսպան Ալեքսեյ Երխովը, գրում է Ռիա Նովոստին։

«Ինչքան ես հասկանում եմ, այդ պահանջները արդեն առաջադրվել են նրանց կողմից, ովքեր չեն վարանում օգտագործել ցանկացած միջոց, այդ թվում՝ կոշտ շանտաժը՝ փորձելով Թուրքիային ստիպել միանալ մեր դեմ կիրառված պատժամիջոցներին։ Հենց այդպես ես կարող եմ մեկնաբանել նամակներն ու հեռախոսազանգերը, որոնք ստանում են թուրքական բիզնեսն ու ասոցիացաները արևմտյան գործընկերներից։ Ռուսաստանը հավանություն չի տալիս նման գործողություններին, ոչ մեկին դուր չեն գալիս նման մեթոդները։ Սակայն, իհարկե, որոշումը մերը չէ, այն Թուրքիան է կայացնելու, նրա կառավարությունը, գործարարներն ու ժողովուրդը»,-ասել է ՌԴ դեսպանը թուրքական Dunya թերթի հետ հարցազրույցում։

Հավելենք, որ Թուրքիան չի միացել ՌԴ-ի դեմ պատժամիջոցներին և ակտիվորեն օգնում է դրանք շրջանցելու հարցում՝ չնայած Արևմուտքի զգուշացումներին։ Հենց այդ զգուշացումների արդյունքում էլ թուրքական բանկերը հրաժարվեցին ռուսական «Միր» վճարային համակարգից։  Այս ամիս Ֆինանսական հանցագործությունների գծով ԱՄՆ ֆինանսների նախարարի օգնական Էլիզաբեթ Ռոզենբերգի գլխավորությամբ ամերիկյան պատվիրակությունը Թուրքիայի իշխանությունների հետ քննարկել էր Անկարայի կողմից ՌԴ-ի դեմ պատժամիջոցների պահպանման հարցը։

Էմմա Չոբանյան