17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Հարավային Կորեան և ԱՄՆ-ն սկսել են ռազմաօդային ուժերի լայնածավալ զորավարժություններ
Քաղաքականություն
31.10.2022 | 14:46
ԱՄՆ-ը և Հարավային Կորեան սկսել են օդային ուժերի լայնածավալ համատեղ զորավարժություններ Կորեական թերակղզում, որում ներգրավված են 240 մարտական ինքնաթիռներ, այդ թվում՝ F-35 կործանիչ-ռմբակոծիչներ, գրում է հարավկորեական Yonhap գործակալությունը:
Հաղորդվում է, որ մոտ 1600 թռիչք է նախատեսվում «Vigilant Storm» զորավարժությունների շրջանակներում: Դաշնակիցները հայտարարել են, որ նման վարժանքներն անհրաժեշտ են Հյուսիսային Կորեայի հնարավոր սպառնալիքին դիմակայելու համար, որն այս տարի ռեկորդային թվով հրթիռներ է արձակել: Բացի այդ, Սեուլը մտավախություն ունի, որ Փհենյանը շուտով կարող է միջուկային փորձարկումներ իրականացնել։
Ինչպես ավելի վաղ հայտնել էին ԱՄՆ Խաղաղօվկիանոսյան ռազմաօդային ուժերի հրամանատարությունից, զորավարժություններին կմասնակցեն նաև կորեացի և ամերիկացի հազարավոր զինվորականներ։ Բացի այդ, Ավստրալիայի թագավորական ռազմաօդային ուժերի թիվ 33 ջոկատը Հարավային Կորեա կուղարկի KC-30A լիցքավորող ինքնաթիռ։ Զորավարժությունները կտևեն մինչև ուրբաթ՝ նոյեմբերի 4-ը։
Հարավային Կորեան չի բացառում, որ Հյուսիսային Կորեան, ի պատասխան դաշնակիցների զորավարժությունների, կարող է փորձել ցուցադրել իր կրակային հզորությունը՝ բալիստիկ հրթիռներ արձակելով։
