Մոսկվան ահռելի կապեր ունի թե՛ Երևանի, թե՛ Բաքվի հետ, և «դա հաշվի չառնելն անհնար է»․ Պուտին․ ՏԵՍԱՆՅՈՒԹ

Ռուսաստանը Հայաստանի կայունությանն ուշադրություն է դարձրել ու միշտ աջակցել է նրան անվտանգության հարցերում։ Այս մասին հայտարարել է ՌԴ նախագահ Վլադիմիր Պուտինը։

«Ինչպես բոլորին լավ հայտնի է՝ Ռուսաստանն ավանդաբար, եթե նայենք պատմությանը, միշտ ուշադրություն է դարձրել այդ ուղղությամբ կայունությանն ու աջակցել է մեր հայ բարեկամների, հայ ժողովրդի անվտանգության ապահովմանը վաղ ժամանակներից»,- ասել է Պուտինը՝ ելույթ ունենալով ՀԱՊԿ անդամ երկրների ղեկավարների արտահերթ գագաթնաժողովին։

Նա նշել է, թե Ռուսաստանի Դաշնությունն անում է հնարավորը՝ Հայաստանի և Ադրբեջանի միջև հարաբերությունների համապարփակ կարգավորման համար։ Պուտինի խոսքով՝ Մոսկվան ահռելի կապեր ունի թե՛ Երևանի, թե՛ Բաքվի հետ, և «դա հաշվի չառնելն անհնար է»:

«Անկասկած, մենք բոլորս բավականին բարդ իրավիճակում ենք»,- շեշտել է ՌԴ նախագահը:

Հիշեցնենք, որ ՀՀ իշխանությունները բազմիցս հայտարարել են, որ Հայաստանն ակնկալում է Ռուսաստանի աջակցությունը՝ ադրբեջանական զորքերը հայկական ինքնիշխան տարածքից դուրս բերելու հարցում, սակայն ՌԴ կողմից որևէ քայլեր չեն ձեռնարկվել։

Հավելենք, որ Հայաստանի վարչապետ Նիկոլ Փաշինյանը հայտնել էր, որ Երևանը նախաձեռնելու է ՀԱՊԿ ղեկավարների հանդիպում՝ Ադրբեջանի հետ սահմանին տիրող իրավիճակի վերաբերյալ։ Կազմակերպությունը նշել է, որ Հավաքական անվտանգության խորհրդի արտահերթ նիստում կքննարկվեն Հայաստանին աջակցության միջոցառումները, ինչպես նաև ՀԱՊԿ առաքելության աշխատանքի արդյունքները։

Տաթև Ֆռանգյան