16.05.2026 | 17:02
Մայիսի 17-ից օդի ջերմաստիճանը կբարձրանա
Ծառայություն 5 տարի ժամկետով. Սուրեն Պապիկյանը Վիգեն Սարգսյանի «Ես եմ»-ի փոխարեն նոր ծրագիր է առաջարկում․ ՏԵՍԱՆՅՈՒԹ
Քաղաքականություն
27.10.2022 | 19:55
Սուրեն Պապիկյանն առաջարկում է դադարեցնել պաշտպանության նախկին նախարար Վիգեն Սարգսյանի կողմից ներդրված «Ես եմ» ծրագիրը։ Պայմանագրային զինվորական ծառայության գրավչությունը բարձրացնելու նպատակով Պապիկյանն առաջարկում է ներդնել շարքային և սպայական կազմերի՝ պարտադիր զինվորական ծառայությունից պայմանագրային զինվորական ծառայության անցման նոր համակարգ, որն անվանվելու է «Պաշտպան հայրենյաց»:
«Ծրագիրը նախատեսում է շարքային և սպայական կազմերի պարտադիր զինվորական ծառայության առաջին 6 ամիսը լրանալուց հետո, Կառավարության կողմից սահմանված կարգով, պայմանագրային զինծառայության անցնելու հնարավորություն՝ ծառայության ժամկետը սահմանելով 5 տարի»,- Կառավարության այսօրվա նիստում ասաց ՊՆ ղեկավարը։
Հինգ տարիների ընթացքում զինծառայողները ստանալու են աշխատավարձ, իսկ ավարտից հետո, անկախ այն հանգամանքից՝ կշարունակե՞ն ծառայությունը, թե՞ ոչ, 5 մլն դրամ պատվովճար։ Այս գումարը կտրվի նաև ծառայությունը վաղաժամ դադարեցնելու դեպքում, եթե հիմքում օրենքով նախատեսված իրավիճակներ են։ Եթե զինծառայողը որևէ պահի հրաժարվի «Պաշտպան հայրենյաց» ծրագրից, ապա պարտավոր է անցնել 24-ամսյա պարտադիր զինծառայություն՝ անկախ նրանից, թե այս ծրագրով որքան ժամանակ է ծառայել։
Կառավարությունն այսօր հավանության արժանացրեց օրենսդրական նախաձեռնությունը, որոշվեց ԱԺ-ում այս նախագծի քննարկումը համարել անհետաձգելի։ Նիկոլ Փաշինյանը վստահ է՝ ծրագրի ներդրումը տանում է դեպի պրոֆեսիոնալ բանակ։
Գործող իշխանությունը «Պաշտպան հայրենյաց» ծրագրի առաջարկը ներկայացնում է՝ հիմնավորելով, թե 2017-ից գործող «Ես եմ» ծրագիրն արդյունավետ չի եղել։ Ըստ Պապիկյանի՝ այդ ծրագրով ծառայությունը շարունակում է ընդամենը երկու զինծառայող։ Նրանց ծառայության 36-ամսյա ժամկետն ավարտվում է 2023 թվականի հունվարին, իսկ 2021-22 թթ․ ձմեռային զորակոչի շրջանակում որևէ մեկը ցանկություն չի հայտնել այս ծրագով ծառայության անցնել։
44-օրյա պատերազմի հանգամանքներն ուսումնասիրող ԱԺ քննիչ հանձնաժողովում աշխատած «Ինքնիշխան Հայաստան» կուսակցության ղեկավար Դավիթ Սանասարյանի խոսքով՝ երաշխիքներ չկան, որ Սուրեն Պապիկյանի առաջարկած նոր ծրագիրը կարող է նորակոչիկների համար գրավիչ լինել։ Ըստ նրա՝ պետք է սկսել բանակի համակարգային խնդիրները լուծելուց։
Պաշտպանության նախարարից այսօր հնարավոր չեղավ թեմայի վերաբերյալ որևէ մեկնաբանություն ստանալ․ նա հրաժարվեց որևէ հարցի պատասխանել։
Պատերազմից հետո առաջնագծում բազմաթիվ խնդիրներ կան, նաև որոշ հատվածներում առկա են չկահավորված դիրքեր։ Արդյո՞ք Սուրեն Պապիկյանն ու Նիկոլ Փաշինյանը չպետք է նախ մտածեն այս խնդիրները լուծելու մասին, հարց է բարձրացնում Դավիթ Սանասարյանը։
Նիկոլ Փաշինյանը դեռ 2020 թվականի պատերազմից հետո էր հայտարարել բանակում բարեփոխումներ իրականացնելու մասին։ Երկու տարի անց, սակայն, բարեփոխումների ուղղությամբ աշխատանքների մասին գերատեսչությունը սակավախոս է։ Պաշտպանության նախարարն այս թեմայի վերաբերյալ հարցերը մշտապես անպատասխան է թողնում, իսկ զինծառայողների ծնողները պարբերաբար շարունակում են ահազանգել բանակում առկա տարատեսակ խնդիրների մասին։
Մանրամասները՝ տեսանյութում։
Նարեկ Կիրակոսյան
