20.11.2024 | 18:30
Կարինե Քոչարը՝ Ռուբեն Քոչարի մեղադրանքների մասին
ՀՀ մուտքի արգելքը կարող է տարածվել նաև այլ անձանց վրա. Ալեն Սիմոնյանը նշում է շրջանակը. ՏԵՍԱՆՅՈւԹ
Քաղաքականություն
26.10.2022 | 21:43
Հայաստանի ինքնիշխան տարածքի և Հայաստանի նկատմամբ անհարգալից վերաբերմունք դրսևորելու համար է Ռուսաստանի Պետդումայի ԱՊՀ հարցերով հանձնաժողովի առաջին փոխնախագահ, Պուտինի առաջնորդած «Եդինայա Ռոսիա» կուսակցության անդամ Կոնստանտին Զատուլինը ՀՀ-ում ճանաչվել անցանկալի անձ, այսօր խորհրդարանում պարզաբանեց Ազգային ժողովի նախագահ Ալեն Սիմոնյանը։
Ռուս պատգամավորը շուրջ կես ամիս առաջ «Երկիր մեդիա» հեռուստաընկերությանը տված հարցազրույցում պնդել էր, թե Նիկոլ Փաշինյանն Ադրբեջանին Նախիջևանի հետ կապող «միջանցք» տրամադրելու փաստաթուղթ է ստորագրել՝ նկատի ունենալով 2020 թվականի նոյեմբերի 9-ի եռակողմ հայտարարությունը։
Չնայած Զատուլինի պնդմանը՝ այդ հայտարարության տեքստում Հայաստանի սուվերեն տարածքով Ադրբեջանին միջանցք տրամադրելու որևէ հիշատակում չկա, խոսքը միայն տարածաշրջանում տրանսպորտային ուղիների բացման մասին է, ինչին Երևանը կողմ է՝ պայմանով՝ եթե այդ ճանապարհները պետք է գործեն պետությունների ինքնիշխանության ներքո։
Քաղաքական մեկնաբան Ռուբեն Մեհրաբյանի խոսքով՝ Զատուլինը կասկածի տակ է դրել ՀՀ տարածքային ամբողջականությունը, ինչպես Ադրբեջանը։
Զատուլինին Հայաստանում «պերսոնա նոն գրատա» ճանաչելու հետ անհաշտ են նաև Ռոբերտ Քոչարյանի առաջնորդած «Հայաստան» դաշինքի պատգամավորները։ Խորհրդարանի աշխատանքները շուրջ կես տարի բոյկոտած Քոչարյանի թիմակիցներից մի քանիսը երեկ ԱԺ էին եկել՝ ի պաշտպանություն Կոնստանտին Զատուլինի ելույթ ունենալու։
Ռուս պատգամավորից բացի՝ որոշվել է Հայաստան չթողնել նաև Կրեմլի քարոզչական գլխավոր մեդիայի՝ RT հեռուստաընկերության գլխավոր խմբագիր Մարգարիտա Սիմոնյանին։ Այս մասին սոցցանցերում գրել է ինքը՝ Սիմոնյանը։ Նա ևս պարբերաբար հանդես է գալիս հակահայ հայտարարություններով։ 2020 թվականի հուլիսին Սիմոնյանը հայտարարել էր, թե «Ռուսաստանը բարոյական իրավունք ունի թքելու Հայաստանի վրա»։ ԱԺ նախագահ Ալեն Սիմոնյանն այսօր կոշտ քննադատելով Մարգարիտա Սիմոնյանին՝ չբացառեց, որ Հայաստան մուտքի արգելք կկիրառվի ոչ միայն նրա նկատմամբ։
Ռուսաստանցի գործիչներին անցանկալի անձ ճանաչելը հոկտեմբերի 31-ին Սոչիում կայանալիք Փաշինյան-Պուտին-Ալիև հանդիպումից առաջ քաղաքական մեկնաբան Ռուբեն Մեհրաբյանը պատահական չի համարում։ Ըստ նրա՝ այստեղ տողատակերում հատուկ ուղերձներ կան։ Հիշեցնենք, որ, ըստ փորձագետների, հենց ՌԴ-ում սպասվող հանդիպմանը Փաշինյանին առաջարկելու են խաղաղության պայմանագիր ռուսական սցենարով և ճնշումներով։ Այն ենթադրում է «միջանցք» Հայաստանի տարածքով, որտեղ հսկողություն են իրականացնելու ռուս սահմանապահները։
Նշենք, որ պաշտոնական Մոսկվան որևէ կերպ չի արձագանքել իր քաղաքացիներին ՀՀ-ում անցանկալի անձ ճանաչելու որոշումներին, ինչպես որևէ պարզաբանում չէր ներկայացնում, երբ նրանք հանդես էին գալիս հակահայ քաղաքականությամբ։ Միայն ինքը՝ Զատուլինն է Հայաստանում իրեն անցանկալի անձ ճանաչելը վիրավորական քայլ համարել ու չեղարկել ռուս և հայ գործիչների մասնակցությամբ հոկտեմբերի 28-ին Երևանում նախատեսված «Լազարևյան ակումբի» նիստը։
Մանրամասները՝ տեսանյութում։
Նարեկ Կիրակոսյան
