Ռիշի Սունակը կոչով դիմել է պահպանողականներին

Ռիշի Սունակը ժամանակ չի ունենա՝ հունի մեջ մտնելու համար. վերջին 200 տարվա մեջ Մեծ Բրիտանիայի ամենաերիտասարդ վարչապետը պետք է գործի հենց այսօր, գրում է Euronews-ը։

Մինչ այդ, Լիզ Թրասը պաշտոնապես հրաժարական կտա, իսկ հետո Չարլզ III թագավորը Բուքինգհեմյան պալատում հանդիպման ժամանակ Սունակին կհանձնարարի կառավարություն ձևավորել։

2015 թվականին Համայնքների պալատի անդամ դառնալուց 4 տարի անց Սունակը ստանձնել է Մեծ Բրիտանիայի գանձապետարանի գլխավոր քարտուղարի պաշտոնը։ Բայց արդեն 2020 թվականին նրան վստահվել է համաճարակի ժամանակ Մեծ Բրիտանիայի ֆինանսական համակարգի կառավարումը։ Մի բան, որը, ըստ շատերի, բավականին հաջողությամբ հաղթահարել է Սունակը՝ բիզնեսին աջակցելու և հարկերը նվազեցնելու միջոցառումներով։

Բայց հիմա նա պետք է զբաղվի լուրջ տնտեսական խնդիրներով և վերականգնի քաղաքական անդորրը այն բանից հետո, երբ Դաունինգ Սթրիթը վերջին յոթ շաբաթվա ընթացքում երրորդ վարչապետն է փոխում։

«Մեզ հիմա պետք է կայունություն և միասնություն, և իմ առաջնահերթությունը կլինի մեր կուսակցության ու մեր երկրի համախմբումը: Որովհետև միայն այդ դեպքում մենք կարող ենք հաղթահարել մեր առջև ծառացած մարտահրավերները և կառուցել ավելի լավ, ավելի բարեկեցիկ ապագա մեր երեխաների և թոռների համար»,- ասել է Մեծ Բրիտանիայի ապագա վարչապետը:

Ռիշի Սունակը պահպանողականներին նախազգուշացրել է, որ ժամանակն է «միավորվելու կամ մեռնելու», քանի որ նա պատրաստվում է մտնել Դունինգ Սթրիթ՝ որպես Մեծ Բրիտանիայի առաջին «գունավոր վարչապետ», գրում է Bloomberg-ը:

Նա հայտարարել է, որ վերջ կդնի պահպանողական հոգեդրամային և խոստացել է առաջնահերթություն տալ «քաղաքականությանը, ոչ թե անձերին»՝ սկսած երեքշաբթի օրը կաբինետի վերադասավորումից: Այն բանից հետո, երբ Սունակը նախազգուշացրել է իր գործընկեր պահպանողականներին, որ ժամանակն է «միավորվելու կամ մեռնելու», վերլուծաբաններն այժմ հետաքրքրությամբ սպասում են նրա կաբինետի ձևավորմանը:

Տաթև Ֆռանգյան