Քաղաքականություն
24.10.2022 | 22:28
Սեպտեմբերի սկզբից Եվրոպայում կորոնավիրուսով վարակման դեպքերի թիվը եռապատկվել է։ Այս մասին հայտնել է Առողջապահության համաշխարհային կազմակերպության (ԱՀԿ) եվրոպական բյուրոյի ղեկավար Հանս Կլյուգեն, փոխանցում է ՌԻԱ Նովոստին։
«Ինչպես և մենք կանխատեսում էին՝ հիվանդության աշնանային բռնկումը հանգեցրել է այն բանին, որ սեպտեմբերի սկզբից տարածաշրջանում հիվանդության դեպքերի թիվը եռապատկվել է։ Հոկտեմբերի երկրորդ շաբաթվա ընթացքում եվրոպական տարածաշրջանին բաժին է ընկել աշխարհում նոր դեպքերի գրեթե 60%-ը և մահվան նոր դեպքերի 42%-ը»,- ասել է Կլյուգը ճեպազրույցում։
Նա հավելել է, որ վերջին տվյալներով՝ Եվրոպայում գրանցվել է կորոնավիրուսի ավելի քան 260 միլիոն դեպք և 2,1 միլիոն մահվան դեպք, ընդհանուր առմամբ, պատվաստանյութի ավելի քան 1,6 միլիարդ չափաբաժին է կիրառվել։
ԱՀԿ պաշտոնյան նաև ընդգծել է, որ գրիպի և COVID-19-ի միաժամանակյա շրջանառությունն առանձնահատուկ վտանգ է ներկայացնում տարեցների, իմունային անբավարարություն ունեցող մարդկանց, հղիների և նորածինների համար։ Ըստ Կլուգի՝ պատվաստումը մնում է ամենաարդյունավետ գործիքը գրիպի և կորոնավիրուսի տարածման դեմ պայքարում։
Տաթև Ֆռանգյան
