Շոյգուն զանգահարել է Ֆրանսիայի և Թուրքիայի պաշտպանության նախարարներին «կեղտոտ ռումբի» մասին պատմելու համար

Ռուսաստանի պաշտպանության նախարար Սերգեյ Շոյգուն կիրակի օրը հերթով զանգահարել է Ֆրանսիայի և Թուրքիայի իր գործընկերներին, որպեսզի նրանց պատմի «կեղտոտ ռումբի» մասին:

BBC-ի ռուսական ծառայության փոխանցմամբ՝ այն մասին, որ Ուկրաինան, իբր, նախատեսում է իր տարածքում ինչ-որ «կեղտոտ ռումբ» պայթեցնել, այսինքն ՝ սովորական զինամթերք, որի պայթյունի ժամանակ մթնոլորտ են մտնում ռադիոակտիվ նյութեր կամ փոքր հզորության միջուկային լիցք, կիրակի առավոտյան գրել է Ռուսաստանի պետական «ՌԻԱ Նովոստի» գործակալությունը։

Միևնույն ժամանակ, գործակալությունը վկայակոչել է տարբեր երկրներում, այդ թվում ՝ Ուկրաինայում, վստահելի աղբյուրներ՝ առանց որևէ այլ հաստատում տրամադրելու:

«ՌԻԱ Նովոստի»-ն գրել է, որ խոսքը սադրանքի մասին է ՝ Ռուսաստանին զանգվածային ոչնչացման զենք կիրառելու մեջ մեղադրելու նպատակով։

Այս շաբաթ պատերազմի ուսումնասիրման ամերիկյան ինստիտուտի (ISW) փորձագետները բաց աղբյուրների հիման վրա մի քանի անգամ նշել են, որ Մոսկվան, հավանաբար, տեղեկատվական ֆոն է պատրաստում ուրիշի դրոշի ներքո սադրանքի համար:

Մասնավորապես, ISW-ն ենթադրում էր, որ ռուս զինվորականները կարող են պայթեցնել Կախովի ՀԷԿ-ի ամբարտակը, որպեսզի արդարացնեն իրենց նահանջը Դնեպրի աջ ափից և դանդաղեցնեն Ուկրաինայի հարձակումը:

Նրանց կարծիքով՝ Կրեմլը կարող է փորձել օգտագործել այդ սադրանքը ռուսական զորքերի երրորդ նվաստացուցիչ նահանջի մասին լուրերից ուշադրությունը շեղելու համար։