07.06.2026 | 23:59
Իրակլի Կոբախիձեն շնորհավորել է Նիկոլ Փաշինյանին ընտրություններում հաջողության կապակցությամբ
Չավուշօղլուն դժգոհել է Հայաստան ԵԱՀԿ առաքելության այցից
Քաղաքականություն
21.10.2022 | 13:05
Թուրքիայի ԱԳ նախարար Մևլութ Չավուշօղլուն քննադատել է ԵԱՀԿ-ի՝ Հայաստան առաքելություն ուղարկելու որոշումը, գրում է Անադոլու գործակալությունը։
Մերսինում ելույթ ունենալիս, նա նշել է, որ ԵԱՀԿ-ն իրեն դրսևորել է որպես «խնդիրների չլուծման կենտրոն», իսկ վերջին որոշումը Հայաստանի մասով, իբր, հակասում է հենց կազմակերպության պահանջներին ու մադատին։ Չավուշօղլուն, սակայն չի նշել, թե որտեղ է հակասությունը, այն դեպքում, երբ կազմակերպության անդամ երկիր Հայաստանը իրավունք ունի իր տարածք հրավիրել միջազգային կառույցի ցանկացած առաքելություն, և որոշումը կայացվել է կառույցի կանոնադությանը համաձայն։
«Սեփական դիրքորոշումը պարտադրելու փորձը և ստատուս քվոյի ձևավորումն անընդունելի է»,- դժգոհել է Չավուշօղլուն։
«Տարիների ընթացքում նրանք պարզապես ձգձգեցին գործընթացը: Իսկ այսօր առաքելություն կամ դիտորդներ ուղարկելիս փորձում են անտեսել Ադրբեջանի դիրքորոշումը։ Հայաստանին աջակցելու ցանկություն կա», -ասել է նա։
Ուշագրավ է, որ առաքելության այցը Հայաստան որևէ առնչություն չունի Անկարայի հետ և այն գնահատելու է Ադրբեջանի հետ սահմանին իրավիճակը, սակայն երրորդ երկրի՝ Թուրքիայի արտաքին գործերի նախարարին այդ փաստը մտահոգում է։ Հիշեցնենք, որ նախօրեին էլ Ադրբեջանի ԱԳՆ-ն էր իր դժգոհությունը հայտնել առաքելության այցի կապակցությամբ։
Հիշեցնենք՝ ՀՀ կառավարության հրավերով այսօր Հայաստան է ժամանում ԵԱՀԿ կարիքների գնահատման թիմը։ Այցի նպատակն է գնահատել իրավիճակը որոշ սահմանամերձ շրջաններում ԵԱՀԿ մանդատի և փորձի համաձայն և նրա անվտանգության համալիր հայեցակարգի շրջանակում։ Թիմը Հայաստանում կլինի մինչև հոկտեմբերի 27-ը։
Էմմա Չոբանյան
