14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Կիևը 6 շաբաթ ունի առաջ շարժվելու համար․ The New York Times
Քաղաքականություն
21.10.2022 | 21:57
Ուկրաինացի զինվորականները վեց շաբաթ ժամանակ ունեն, որի ընթացքում նրանք կարող են առաջընթաց գրանցել Ռուսաստանի զինված ուժերի դեմ, եթե շարունակեն հարձակումը հարավում և հյուսիս-արևելքում՝ մինչև եղանակային պայմանները հակառակորդ ուժերին ստիպեն դադար վերցնել ու վերախմբավորվել։ Նման գնահատականներ է ներկայացրել ամերիկյան The New York Times-ը, որին վկայակոչում է DW-ի ռուսական ծառայությունը։
Ամերիկյան կողմը կարծում է, որ ռուսական ուժերի մասշտաբային ձախողում, որը թույլ կտար Ուկրաինային հետ բերել տարածքի նշանակալի մասը, ինչպես նախորդ ամիս էր, քիչ հավանական է։ Սակայն ռուսական ստորաբաժանումները կարող են դիրքերը զիջել ուկրաինական զորքերի ճնշմամբ, ինչը թույլ կտա Կիևին շարունակել հետ վերադարձնել Դոնբասի քաղաքները և, հնարավոր է, նաև Խերսոնը։
«Ուկրաինան ունի հնարավորության պատուհան։ Ուկրաինացիներն ազատ են ընտրության հարցում՝ որ հատվածներում կարող են հարձակվել»,- ասել է Պատերազմի ուսումնասիրման ինստիտուտի (ISW) ռազմական վերլուծաբան Մեյսոն Քլարքը։
Ամերիկյան աղբյուրները մասնավոր զրույցներում ասում են, որ Ուկրաինան պետք է շարունակի օգտագործել իր առավելությունն առաջիկա շաբաթների ընթացքում: Միևնույն ժամանակ, սակայն, Կիևը չպետք է չափից ավելի ընդլայնի ռազմական մատակարարման գծերը կամ ռուսական բանակին հնարավորություն տա օգտագործել ցանկացած թուլություն Ուկրաինայի պաշտպանական դիրքերում։
Ամերիկացի և ուկրաինացի պաշտոնյաները զգուշանում են ճշգրիտ կանխատեսումներ անել, սակայն ենթադրում են, որ ռազմական գործողությունները, հավանաբար, շարունակվելու են դեռ մի քանի ամիս, չնայած վերջին շրջանում իրադրությունն Ուկրաինայի օգտին է։
Էմմա Չոբանյան
