09.10.2026 | 15:35
Երևանում սպասվում են կարճատև անձրևներ
Երևանին օգնության հարցը կքննարկվի ՀԱՊԿ Հավաքական անվտանգության խորհրդում. Զախարովա
Քաղաքականություն
20.10.2022 | 16:30
Հայաստանին օգնություն տրամադրելու հարցը կքննարկվի ՀԱՊԿ Հավաքական անվտանգության խորհրդում։ Այս մասին ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով հայ-ադրբեջանական սահման կազմակերպության դիտորդների ուղարկելու վերաբերյալ հարցին։
«Մշակվում է առաջիկայում ՀԱՊԿ Հավաքական անվտանգության խորհրդի արտահերթ նիստ անցկացնելու հարցը։ Ակնկալվում է, որ առաջիկա հանդիպման ընթացքում անդամ երկրների ղեկավարները տեսակոնֆերանսի միջոցով կքննարկեն Հայաստանում ՀԱՊԿ առաքելության աշխատանքի արդյունքները»,- ասել է Զախարովան։
Նրանք, Զախարովայի խոսքով, պետք է քննարկեն Երևանին օգնություն ցուցաբերելու համատեղ միջոցառումների առաջարկները, այդ թվում՝ ՀԱՊԿ Հավաքական անվտանգության խորհրդի որոշման նախագիծը Հայաստանին օգնություն ցուցաբերելու համատեղ միջոցառումների մասին։
Միաժամանակ, նա չի պարզաբանել, թե ի՞նչ աջակցության մասին է խոսքը՝ նշելով, որ այդ հարցը պետք է համաձայնեցվի հանդիպման ժամանակ։ Նշենք, որ երկու օր առաջ Հայաստանի արտգործնախարար Արարատ Միրզոյանը հայտարարել էր, որ ՀԱՊԿ և ԵԱՀԿ առաքելություններ կարող են տեղակայվել հայ-ադրբեջանական սահմանին։
Հավելենք՝ Զախարովան տեղեկացրել է, որ այս թեմայի վերաբերյալ լրացուցիչ տեղեկություն կտրամադրվի ՀԱՊԿ քարտուղարության միջոցով։
Տաթև Ֆռանգյան
