Արարատ Միրզոյանը՝ ԵՄ առաքելությունից ՀՀ ակնկալիքների մասին․ ՏԵՍԱՆՅՈՒԹ

Մեր ակնկալիքները փոփոխության չեն ենթարկվել, մենք ակնկալում ենք միջազգային դերակատարում Հարավային Կովկասում և մասնավորապես, Հայաստան-Ադրբեջան սահմանին խաղաղության հաստատման գործում: Այս մասին այսօր Երևանում Նորվեգիայի ԱԳ նախարար Աննիկեն Հյութֆիլդտի հետ համատեղ ասուլիսի ժամանակ հայտարարեց ՀՀ ԱԳ նախարար Արարատ Միրզոյանը՝ անդրադառնալով ԵՄ դիտորդական առաքելությանը, որը պետք է տեղակայվի հայ-ադրբեջանական սահմանին՝ Հայաստանի կողմից:

«Մեր ակնկալիքն այն է, որ Եմ առաքելությունը որոշակի փաստահավաք մաս կունենա և այդ փաստերը կվկայեն, որ Հայաստանի պնդումները, որ տեղի է ունեցել ագրեսիա Հայաստանի  ինքնիշխան տարածքի նկատմամբ և կա ադրբեջանական զորքերի ներխուժում Հայաստանի  միջազգայնորեն ճանաչված տարածք, համապատասխանում են իրականությանը: Բայց նաև պետք է այս առաքելությանը վերագրենք հետագա նոր ագրեսիայի կանխման կարևոր առաքելություն: Ես հույս ունեմ, որ ԵՄ-ից եկող այս առաքելությունը դերակատարում կունենան այս հարցում»,- նշեց Միրզոյանը:

Հարցին, թե արդյոք նմանատիպ դիմում եղել է նաև ԵԱՀԿ-ին, որպեսզի ԵԱՀԿ-ից նույնպես դիտորդական առաքելություն գա, Արարատ Միրզոյանը դրական պատասխան տվեց. «Այո, իրավացի եք, քննարկվում է նաև մեր սահմանագծին հայկական կողմից Հայաստան-Ադրբեջան սահմանին ԵԱՀԿ դիտորդներ գործուղելու թեման: Շատ մոտ ապագայում այս մասով ևս հստակություն կունենանք»:

Ինչ վերաբերում է ՀԱՊԿ դիտորդներին, Միրզոյանը նշեց. «Դիմել ենք ՀԱՊԿ-ին, որին անդամակցում ենք: Այդ կազմակերպությունում որոշում է կայացվել նախնական փաստահավաք առաքելություն ուղարկել: Եկել են պաշտոնյաները, իրենց արձանագրումների հիման վրա զեկույց են պատրաստել, այն ներկայացված է բոլոր անդամ-պետություններին: Զեկույցի հիման վրա քարտուղարությունը որոշման նախագիծ է շրջանառել, մենք բանավոր քննարկումներով փորձել ենք հասկանալ՝ երբ կարող է տեղի ունենալ ՀԱՊԿ խորհրդի նիստը, որտեղ երկրների ղեկավարները կարող են քննարկել նաև այդ առաքելության գործուղումը: Այս փուլում ենք այժմ: Որոշում չկա, քննարկումներ կան»:

Նա չափազանց կարևորեց իրավիճակի քաղաքական գնահատականը:

«Մեզ նախևառաջ պետք է հասկանալ՝ որքանով է կազմակերպությունը ճանաչում այս իրավիճակը»,- ասաց ՀՀ ԱԳ նախարարը:

Մանրամասները՝ տեսանյութում։